| 章節 | 台語漢字本聖經 請按此下載安裝Open Han 2024版字型，免得漏掉造字 |
| 2:1 | 大衛受抹油做猶大王 後來，大衛問耶和華講：「我上去猶大一個城通嗎？」耶和華給伊講：「通上去。」大衛講：「我著上去叨落？」伊講：「到希伯崙。」 |
| 2:2 | 大衛就及伊二個某──就是耶斯列人亞希暖，及迦密人曾做拿八的某名亞比該──攏上去遐。 |
| 2:3 | 大衛也互跟隨伊的人及𪜶逐人的家眷攏上去，𪜶就𫢶佇希伯崙許個城。 |
| 2:4 | 猶大人到，佇遐用油抹大衛做猶大家的王。 有人給大衛講：「埋葬掃羅的是基列‧雅比的人。」 |
| 2:5 | 大衛就差使者去見基列‧雅比的人，給𪜶講：「願耶和華賜福恁！因為恁用此個仁慈款待你的主──掃羅；給伊埋葬。 |
| 2:6 | 願耶和華用仁慈誠實款待恁，我也欲答恁此個仁慈，因為恁有行此個事。 |
| 2:7 | 恁的手著嚴硬，恁著勇敢，因為恁的主──掃羅已經死。猶大族也有用油抹我做𪜶的王。」 |
| 2:8 | 伊施波設做以色列王 掃羅的軍長尼珥的子押尼珥，曾將掃羅的子伊施波設帶伊過去瑪哈念， |
| 2:9 | 設立伊做王，治理基列、亞書利、耶斯列、以法蓮、便雅憫，及以色列的眾人。 |
| 2:10 | 掃羅的子伊施波設起頭做以色列王，彼時四十歲，坐位二年；獨獨猶大族隨大衛。 |
| 2:11 | 大衛佇希伯崙做猶大族的王，歷過七年閣六月日。 |
| 2:12 | 掃羅家及大衛家交戰 尼珥的子押尼珥及掃羅的子伊施波設的人臣對瑪哈念出來，去基遍。 |
| 2:13 | 洗魯雅的子約押及大衛的人臣也出來，佇基遍的池邊相抵著；𪜶就坐啲，一隊坐佇池的此旁，一隊坐佇池的彼旁。 |
| 2:14 | 押尼珥對約押講：「請你互少年人起來，佇咱的面前滾笑。」約押講：「通互伊起來。」 |
| 2:15 | 𪜶就起來照數額過去：屬掃羅的子伊施波設的便雅憫人十二名，大衛的人臣也有十二名， |
| 2:16 | 逐個搝伊對面彼人的頭殼，用刀鑿伊對面彼人的脇，做一下倒落去死。所以，彼所在叫做希利甲‧哈素林，就是佇基遍。 |
| 2:17 | 彼日的交戰真雄，押尼珥及以色列人卡輸佇大衛的兵的面前。 |
| 2:18 | 佇遐有洗魯雅三個子：約押、亞比篩、亞撒黑。亞撒黑的腳𠢕走親像野鹿一般； |
| 2:19 | 亞撒黑追趇押尼珥無偏左右，直直趇押尼珥。 |
| 2:20 | 押尼珥越頭看講：「亞撒黑啊，是你抑是？」應講：「是我。」 |
| 2:21 | 押尼珥給伊講：「你著越轉正旁抑是倒旁，掠一個少年人，為你本身剝伊的戰衫。」總是亞撒黑直直追伊，肯越轉。 |
| 2:22 | 押尼珥閣給亞撒黑講：「你越轉莫得追趇我！我啥事著拍你倒地？若按呢，我有甚麼面目通去見你的兄約押？」 |
| 2:23 | 伊猶原肯越轉。押尼珥才用槍柄後的刀鑿入伊的腹肚，槍就𥦁過伊的尻脊後，伊就倒佇遐死。見若來到亞撒黑倒啲死的所在，就攏停腳。 |
| 2:24 | 約押及亞比篩追趇押尼珥；𪜶到基亞相對面的亞瑪山，佇基遍曠野的路，日就落。 |
| 2:25 | 便雅憫人聚集，隨押尼珥做一陣徛佇山頂。 |
| 2:26 | 押尼珥叫約押講：「刀劍刣人永無息嗎？你豈知到尾有艱苦嗎？你欲到甚麼時互百姓倒去、無趇𪜶的兄弟啊？」 |
| 2:27 | 約押講：「我指永活的上帝來咒誓：若是你講，早起百姓就倒去，無趇伊的兄弟。」 |
| 2:28 | 對按呢約押歕哨角，眾百姓就徛啲，無閣追趇以色列人，也無閣交戰。 |
| 2:29 | 押尼珥及隨伊的人通暝行經過亞拉巴，過約但，對畢倫過去，到瑪哈念。 |
| 2:30 | 約押無閣趇押尼珥就倒來，聚集眾百姓，大衛的兵減十九人及亞撒黑。 |
| 2:31 | 總是大衛的兵拍死便雅憫人及隨押尼珥的人，共三百六十人。 |
| 2:32 | 𪜶扛亞撒黑去伯利恆，埋葬佇𪜶老父的墓。約押及隨伊的人通暝行，到希伯崙的時天抵仔光。 |