| 章節 | 台語漢字本聖經 請按此下載安裝Open Han 2024版字型，免得漏掉造字 |
| 21:1 | 大衛閃避掃羅 大衛到羅伯到祭司亞希米勒遐，亞希米勒驚惶來接大衛，對伊講：「你啥事家己來，無人及你來啊？」 |
| 21:2 | 大衛應祭司亞希米勒講：「王命令我一件事閣給我講：『我所差你的事及我所命令你的，攏通互人知。』我已經派少年人佇某所在聽候我。 |
| 21:3 | 今你的手有甚麼物？請你用五個餅互我抑是別項。」 |
| 21:4 | 祭司對大衛講：「我的手裡無平常的餅，只有聖的餅；若少年人無親近婦仁人才通。」 |
| 21:5 | 大衛應祭司給伊講：「到今約略有三日未曾親近婦仁人；我出門的時，雖然是平常的代誌，少年人的器具是清氣；何況今仔日𪜶的器具豈無聖嗎？」 |
| 21:6 | 祭司就提聖的餅互伊；因為佇遐無別物的餅，只有排列的餅，對耶和華的面前提起來的，提起來彼日是欲下燒的餅來排伊。 （ |
| 21:7 | 當彼日佇遐有掃羅的奴僕留佇耶和華的面前。名叫多益，是以東人，做掃羅顧精牲者的頭人。） |
| 21:8 | 大衛問亞希米勒講：「你手下有槍抑是刀抑無？因為王的代誌真緊急，我攏無帶刀及器械。」 |
| 21:9 | 祭司講：「有非利士人歌利亞的刀，就是你前佇以拉的山谷所刣死的佇遮，包佇布裡，佇以弗得的後面，你若欲用就攑去；因為彼支以外，無別項。」大衛講：「此支刀無一支會比得伊！請你互我。」 |
| 21:10 | 彼日大衛起身，閃避掃羅，走到迦特王亞吉遐。 |
| 21:11 | 亞吉許個人臣給伊講：「此個豈是彼國的王大衛嗎？𪜶佇跳舞中唱和講『掃羅刣死𪜶的千千，大衛刣死𪜶的萬萬。』豈是指此人嗎？」 |
| 21:12 | 大衛將諸個話存佇心內，真驚迦特王亞吉， |
| 21:13 | 就佇眾人的面前改換舉動，佇𪜶的手下假癲狂，佇城門的門扇亂寫亂畫，互涎流佇嘴鬚裡。 |
| 21:14 | 亞吉給伊的人臣講：「恁看，此個人是癲狂。啥事帶伊來我遮啊？ |
| 21:15 | 我豈有欠用癲狂的，恁才導此人來癲狂佇我的面前啊？此人豈通入我的厝嗎？」 |