| 章節 | 台語漢字本聖經 請按此下載安裝Open Han 2024版字型，免得漏掉造字 |
| 27:1 | 以撒祝福雅各 以撒年老，目睭花，𣍐看見，就叫伊的大子以掃來，給伊講：「我的子啊。」伊應講：「我佇遮。」 |
| 27:2 | 講：「我今老啦，知叨落一日欲死。 |
| 27:3 | 今攑你的家私，就是箭袋及弓，去山裡給我拍獵， |
| 27:4 | 照我所合意的煮互伊好滋味，捧來互我，我通食，互我佇未死的代先給你祝福。」 |
| 27:5 | 以撒給伊的子以掃講話的時，利百加聽見。以掃去山裡欲拍獵，通帶倒來。 |
| 27:6 | 利百加就對伊的子雅各講：「你看，我聽見恁老父給你的兄以掃講： |
| 27:7 | 『你將野獸給我帶來，給我煮互伊好滋味互我食，我欲佇未死的代先，佇耶和華的面前給你祝福。』 |
| 27:8 | 今，我的子，你著聽我的話，照我所吩咐你的。 |
| 27:9 | 你去羊群遐，給我掠二隻肥的山羊仔來，我欲給你的老父煮好的味素，照伊所合意的。 |
| 27:10 | 你捧去恁老父遐互伊食，互伊佇未死的代先給你祝福。」 |
| 27:11 | 雅各對伊的老母利百加講：「拘我的兄以掃身軀有毛，我是光滑； |
| 27:12 | 設使我的老父摸著我，欲看我做欺騙人者，我就招咒詛，無得著祝福。」 |
| 27:13 | 伊的老母講：「我的子啊！你招的咒詛歸佇我；做你聽我的話，去掠來互我。」 |
| 27:14 | 伊就去掠來互伊的老母；老母就煮好的滋味，照老父所合意的。 |
| 27:15 | 利百加閣擜大子以掃收佇伊家內的媠衫給伊的細子雅各穿， |
| 27:16 | 閣用山羊的皮包雅各的手及伊頷頸光滑的位， |
| 27:17 | 就將所煮的好滋味及餅下佇伊的子雅各的手。 |
| 27:18 | 雅各到𪜶老父遐講：「我的父啊！」伊講：「我佇遮。我的子，你是是誰？」 |
| 27:19 | 雅各對伊的老父講：「我是你的大子以掃；我已經照你所吩咐我的去行。請你起來坐，食我所拍著的，好通給我祝福。」 |
| 27:20 | 以撒對伊的子講：「我的子，你怎樣即快得著？」伊講：「因為你的上帝──耶和華互我好遭遇來得著。」 |
| 27:21 | 以撒給雅各講：「我的子啊！你近倚來，我欲摸你，看你真正是我的子以掃抑是。」 |
| 27:22 | 雅各就倚近伊的老父以撒。伊就摸伊講：「聲是雅各的聲，手是以掃的手。」 |
| 27:23 | 以撒分別𣍐明，因為伊的手有毛，親像伊的兄以掃的手，就給伊祝福； |
| 27:24 | 閣講：「你真正是我的子以掃嗎？」伊講：「我是。」 |
| 27:25 | 以撒講：「捧來互我，我欲食我的子所得著的野味，好通給你祝福。」就捧互伊，伊就食，亦捧酒互伊，伊就飲。 |
| 27:26 | 伊的老父以撒對伊講：「我的子，進前來唚我。」 |
| 27:27 | 伊就進前，唚伊的老父。伊的老父鼻著伊的衫的芳味，就給伊祝福，講：
我的子的芳味 親像耶和華賜福的田的芳味。 |
| 27:28 | 願上帝賞賜你天頂的甘露，
世上的肥地， 五穀及新的酒真多。 |
| 27:29 | 眾百姓服事你，
列國跪拜你。 你做你兄弟的主； 你的老母的子跪拜你。 咒詛你的受咒詛， 祝福你的得著福氣。 |
| 27:30 | 以掃求以撒祝福 以撒給雅各祝福明白，雅各抵抵對伊的老父以撒遐出來，伊的兄以掃拍獵倒來， |
| 27:31 | 伊亦煮好的味素，捧來互伊的老父，講：「我的父啊！請起來，食子所拍著的，好通給我祝福。」 |
| 27:32 | 伊的老父以撒給伊講：「你是是誰？」伊講：「我是你的子，就是你的大子以掃。」 |
| 27:33 | 以撒大驚愕愕惙，講：「彼是是誰？你未來的代先捧伊所拍著的來互我，我食伊，給伊祝福；伊的確欲得著福氣。」 |
| 27:34 | 以掃聽見老父的話，開聲叫苦大哭，對伊的老父講：「我的父啊！我，你亦著給我祝福！」 |
| 27:35 | 以撒講：「你的小弟用詭計來搶你的福份。」 |
| 27:36 | 以掃講：「伊名做雅各，豈無真合嗎？伊欺騙我二擺：前搶我大子的名份，你看，今伊閣搶我的福份。」閣講：「豈無留一個通給我祝福嗎？」 |
| 27:37 | 以撒應以掃講：「我已經立伊做你的主，亦將伊的眾兄弟互伊做奴僕，亦用五穀新酒養飼伊。我的子啊！今我猶會給你做甚麼？」 |
| 27:38 | 以掃給伊的老父講：「父啊！你的祝福豈只有一擺嗎？我的父啊！我，你亦著給我祝福！」以掃開聲啼哭。
|
| 27:39 | 伊的老父以撒應伊講：
你所徛起的欲有世上的肥地； 亦有天頂的甘露。 |
| 27:40 | 你欲倚靠刀劍度活，
閣欲服事你的小弟； 到你奮興的時， 欲對你的頷頸滾開伊的牛軛。 |
| 27:41 | 以掃因為伊的老父給雅各祝福氣，就怨恨雅各，心內講：「為老父丁憂的時近啦，到彼時，我欲刣死我的小弟雅各。」 |
| 27:42 | 有人將伊的大子以掃的話給利百加講，伊就差人去叫伊的細子雅各來，給伊講：「你的兄以掃欲刣你，來消伊的恨氣。 |
| 27:43 | 今，我的子，你著聽我的話：起來，走去哈蘭、我的兄拉班遐， |
| 27:44 | 及伊𫢶幾日，聽候你的兄受氣消。 |
| 27:45 | 到你的兄受氣息，𣍐記得你對伊所做的事，彼時我就差人導你對遐倒來。我啥事一日失落恁二人？」 |
| 27:46 | 以撒差雅各去拉班的家 利百加給以撒講：「我因為諸個赫人的查某子連性命都愛；設使雅各也娶此所在的查某子做某，親像赫人的查某子彼款，我活有啥路用？」 |