| 章節 | 台語漢字本聖經 請按此下載安裝Open Han 2024版字型，免得漏掉造字 |
| 18:1 | 大衛及掃羅講明白，約拿單的生命及大衛的生命生相連。約拿單疼伊，親像家己的生命。 |
| 18:2 | 彼日掃羅留伊，無互伊倒去老父的家。 |
| 18:3 | 約拿單及大衛二人結約，因為伊疼伊親像家己的生命。 |
| 18:4 | 約拿單褪伊身軀的外衫，互大衛，閣將伊的軍服，連伊的刀，伊的弓，伊的腰帶，也互伊。 |
| 18:5 | 見若掃羅差伊去叨落，大衛所去無精通。掃羅就設立伊做戰士的頭人，眾百姓及掃羅的人臣攏看做好。 |
| 18:6 | 掃羅妒忌大衛 大衛拍死彼個非利士人倒轉，𪜶倒來的時，許個婦女對以色列逐個城出來，唱歌跳舞，用鈴瓏鼓，用歡喜，用作樂的器具，來迎接掃羅王。 |
| 18:7 | 許個婦女跳舞有的唱有的和，講：「掃羅刣死𪜶千千，大衛刣死𪜶萬萬。」 |
| 18:8 | 掃羅不止受氣，無歡喜此個話，就講：「將萬萬互大衛，千千互我，只有剩國位未互伊若定。」 |
| 18:9 | 對彼日起，掃羅看見大衛就眥伊。 |
| 18:10 | 隔日，對上帝遐來的歹神大大臨到掃羅，伊就佇厝內講先知話。大衛照常用手彈琴，掃羅手裡有槍。 |
| 18:11 | 掃羅用槍擲去，因為講，我欲刺大衛，釘伊佇壁裡。大衛佇伊的面前閃避二擺。 |
| 18:12 | 掃羅驚大衛；因為耶和華及伊佇啲，離開掃羅。 |
| 18:13 | 掃羅才互大衛離開伊，設立伊做千總，伊佇百姓的面前出入。 |
| 18:14 | 大衛見所做的代誌無精通，耶和華及伊佇啲。 |
| 18:15 | 掃羅看見大衛所做的代誌真精通，不止驚伊。 |
| 18:16 | 獨獨以色列及猶大的眾人攏疼大衛，因為伊佇𪜶面前出入。 |
| 18:17 | 大衛娶掃羅的查某子 掃羅給大衛講：「看啊，我欲用大查某子米拉互你做某，獨獨愛你做我的勇士，替耶和華交戰。」掃羅心內講：「我通親手害伊，著借非利士人的手害伊。」 |
| 18:18 | 大衛給掃羅講：「我是是誰，我有甚麼身份，我老父的家佇以色列中是甚麼號的家，我通做王的子婿嗎？」 |
| 18:19 | 掃羅的查某子米拉定著互大衛的期到啦，竟然互米何拉人亞得列做某。 |
| 18:20 | 掃羅的查某子米甲疼大衛。有人給掃羅講，掃羅歡喜此個事。 |
| 18:21 | 掃羅心內講：「我將此個查某子互大衛，做羅網來網伊，通借非利士人的手害伊。」掃羅就給大衛講：「今此個第二擺你通做我的子婿。」 |
| 18:22 | 掃羅吩咐人臣講：「恁暗靜給大衛講：『王歡喜你，人臣也疼你，所以你通做王的子婿。』」 |
| 18:23 | 掃羅的人臣就將諸個話講互大衛聽。大衛講：「恁拍算做王的子婿是小可事嗎？我是喪鄉卑微的人。」 |
| 18:24 | 掃羅的人臣回覆講，大衛所講的按呢按呢。 |
| 18:25 | 掃羅講：「恁著對大衛按呢講：『王愛甚麼聘禮，只有欲一百個非利士人陽物的皮，通報仇佇王的對敵。』」掃羅的意思欲互大衛死佇非利士人的手。 |
| 18:26 | 伊的人臣將諸個話給大衛講，大衛歡喜欲做王的子婿。日期猶未到， |
| 18:27 | 大衛起來及隨伊的人起身去，刣死二百個非利士人，大衛帶許個陽物的皮，𪜶就照數額一盡獻互王，互伊通做王的子婿。對按呢掃羅將查某子米甲互伊做某。 |
| 18:28 | 掃羅看見閣知耶和華及大衛佇啲，閣掃羅的查某子米甲也疼伊， |
| 18:29 | 掃羅益發驚大衛，掃羅常常做大衛的對敵。 |
| 18:30 | 非利士許個首領出來交戰，𪜶逐擺出來，大衛所行比掃羅許個人臣卡精通，對按呢伊的名互人閣尊重。 |