| 章節 | 台語漢字本聖經 請按此下載安裝Open Han 2024版字型，免得漏掉造字 |
| 14:1 | 約拿單的勇敢戰績 有一日，掃羅的子約拿單給攑伊的軍器的少年人講：「來，咱來去彼旁，到非利士人軍營遐。」總是伊無給𪜶老父講。 |
| 14:2 | 掃羅佇基比亞的極頭，坐佇米磯崙的石榴樹腳，隨伊的約略有六百人。 |
| 14:3 | 閣有亞希突的子亞希亞，帶以弗得。（是以迦博的兄，非尼哈的子，以利的孫，就是佇示羅做耶和華的祭司的。）百姓知約拿單去。 |
| 14:4 | 約拿單欲去非利士的軍營所欲過許個隘口的中間。此旁有石的山尖彼旁也有石的山尖：一個名播設，一個名西尼； |
| 14:5 | 一個石的山尖佇北旁，及密抹相對，一個石的山尖佇南旁，及迦巴相對。 |
| 14:6 | 約拿單給攑伊的軍器的少年人講：「來，咱來去無受割禮的人的軍營遐，豈採耶和華欲替咱做代誌；因為耶和華的救人，無限定人的多少。」 |
| 14:7 | 攑伊的軍器者給伊講：「照你的心所愛的攏行伊。通進前去，我及你同心，欲隨你去。」 |
| 14:8 | 約拿單講：「咱欲經過到許個人遐，互𪜶看見咱。 |
| 14:9 | 𪜶若按呢給咱講：『恁徛啲，聽候阮到恁遐』，咱就定定徛啲，無上去𪜶遐。 |
| 14:10 | 𪜶若講：『恁上來阮遮』，咱就上去，因為耶和華將𪜶交佇咱的手，此個話通做咱的證據。」 |
| 14:11 | 二人就互非利士防守的兵看見。非利士人講：「希伯來人對所匿的洞出來！」 |
| 14:12 | 防守的兵給約拿單及攑伊的軍器的人講：「恁上來阮遮，阮有一項代誌欲報恁。」約拿單就給攑伊的家私者講：「你隨我上去，因為耶和華將𪜶交佇以色列人的手。」 |
| 14:13 | 約拿單就用手擒腳踜上去，攑伊的軍器的人隨伊。非利士人倒佇約拿單的面前，攑伊的軍器的人也隨伊的後面來刣𪜶。 |
| 14:14 | 約拿單及攑伊的軍器的人起頭所刣的約略二十人，攏是佇半畝園的犂溝。 |
| 14:15 | 對按呢佇營盤、佇田野、佇眾百姓的中間攏愕愕惙，防守的兵及搶劫的兵也攏愕愕惙，地也振動，致到愕愕惙到極。 |
| 14:16 | 非利士人敗退 佇便雅憫的基比亞，掃羅守望的兵啲看，看見非利士的眾軍兵四散，四界亂亂走。 |
| 14:17 | 掃羅就給隨伊的百姓講：「恁點算，看是誰對咱遮出去？」𪜶點算了，就知約拿單及攑伊的軍器的人無佇啲。 |
| 14:18 | 掃羅給亞希亞講：「你著帶上帝的約櫃來。」因為彼時上帝的約櫃佇以色列人的所在。 |
| 14:19 | 掃羅及祭司講話的時，非利士營中喊嘩的聲愈久愈大；掃羅就給祭司講：「免動你的手！」 |
| 14:20 | 掃羅及隨伊的百姓攏聚集，來到戰場，看見非利士人逐個用刀相剆，真大亂。 |
| 14:21 | 以前倚非利士人的希伯來人對四方隨到伊的營的，今也反轉來幫助隨掃羅及約拿單的以色列人。 |
| 14:22 | 許個匿佇以法蓮山地的以色列人聽見非利士人逃走，𪜶就出來趇倚𪜶的後面來交戰。 |
| 14:23 | 彼日，耶和華拯救以色列，直直戰到伯‧亞文。 |
| 14:24 | 戰後發生的事件 彼日以色列人真困苦，因為掃羅向百姓咒誓講，無等到日暗，聽候我報我的對敵的冤讎的代先，食物的人著受咒詛。所以百姓無食甚麼。 |
| 14:25 | 眾百姓入樹林，看見有蜜佇地上。 |
| 14:26 | 百姓入樹林，看見有蜜啲滴，總是無人敢用手提入嘴，因為百姓驚許個咒誓的話。 |
| 14:27 | 約拿單無聽見𪜶老父向百姓咒誓，所以伸伊手裡的枴仔尾，托佇蜜房，伊的手越到嘴裡，目睭就金。 |
| 14:28 | 百姓中有一人給伊講：「你的老父向百姓嚴嚴咒誓講，今仔日食甚麼的，著受咒詛；百姓就真厭倦。」 |
| 14:29 | 約拿單講：「我的父害著此個地方。恁看，我試此一點仔蜜，目睭就金。 |
| 14:30 | 何況百姓今仔日若出在意思食𪜶所搶對敵的物，拍死非利士人豈無閣卡多嗎？」 |
| 14:31 | 彼日，𪜶拍非利士人，對密抹到亞雅崙。百姓真厭倦， |
| 14:32 | 百姓就趕緊走去提所搶的羊、牛、牛仔子刣佇地裡，肉猶有血就食伊。 |
| 14:33 | 有人給掃羅講：「百姓得罪耶和華啦，因為𪜶食猶有血的肉。」伊講：「恁差謬啦，今著翱大塊石來我遮。」 |
| 14:34 | 掃羅閣講：「恁著四界行佇百姓的中間，給𪜶講，逐人牽𪜶的牛逐人牽𪜶的羊來我遮，佇遮刣來食；通食猶有血的肉來得罪耶和華。」彼暝，百姓逐人牽𪜶的牛去遐刣。 |
| 14:35 | 掃羅給耶和華起一座壇，這是伊頭一擺給耶和華起的壇。 |
| 14:36 | 掃羅講：「咱今著透暝落去趇非利士人，搶𪜶，到天光，無留𪜶一人。」百姓講：「你所看做好的就行伊！」祭司講：「咱著來遮親近上帝。」 |
| 14:37 | 掃羅問上帝講：「我著落去趇非利士人抑免？你欲將𪜶交互以色列的手嗎？」彼日上帝無應伊。 |
| 14:38 | 掃羅講：「恁百姓中的序大攏著上來遮，查明今仔日此個罪是在佇甚麼。 |
| 14:39 | 我指救以色列──永活的耶和華來講，雖然我的子約拿單，伊也著死。」總是百姓中無一人應伊。 |
| 14:40 | 伊就給以色列的眾人講：「恁徛此旁，我及我的子約拿單徛彼旁。」百姓對掃羅講：「你看做好的就行伊！」 |
| 14:41 | 掃羅給耶和華──以色列的上帝講：「求你指示實情。」對按呢拈著約拿單及掃羅；百姓攏無代誌。 |
| 14:42 | 掃羅講：「著佇我，及我的子約拿單的中間來拈鬮。」就拈著約拿單。 |
| 14:43 | 掃羅給約拿單講：「你給我講，你做甚麼事？」約拿單講：我實在用手裡的柺仔尾，搵一點仔蜜來試覓啲。按呢我著死啊？」 |
| 14:44 | 掃羅講：「約拿單啊，你的確著死！願上帝按呢行，也比按呢猶卡重。」 |
| 14:45 | 百姓給掃羅講：「約拿單已經行此個大的拯救佇以色列的，伊著死嗎？決斷通！阮指永遠的耶和華來講，伊一支頭毛也的確無磕落佇地裡，因為伊今仔日及上帝相及做代誌。」對按呢百姓救約拿單免死。 |
| 14:46 | 掃羅就上去，無追趇非利士人；非利士人也去伊本所在。 |
| 14:47 | 掃羅的王權及家眷 掃羅掌國的權柄治理以色列，去及四圍攏總的對敵交戰，就是攻擊摩押人、亞捫人、以東、及瑣巴諸個王，及非利士人。伊無論所去，攏卡贏。 |
| 14:48 | 掃羅奮勇攻擊亞瑪力人，救以色列脫離搶𪜶的人的手。 |
| 14:49 | 掃羅的子是約拿單、亦施韋、麥基舒亞。伊二個查某子的名：大的名叫米拉，細的名叫米甲。 |
| 14:50 | 掃羅的某，名叫亞希暖，是亞希瑪斯的查某子。伊的軍長名叫押尼珥，是尼珥的子；尼珥是掃羅的叔。 |
| 14:51 | 掃羅的老父基士，押尼珥的老父尼珥，就是亞別的子。 |
| 14:52 | 掃羅一生常常及非利士人大交戰。掃羅見若看見有能力的人抑是勇士，就招集來倚伊。 |