| 章節 | 台語漢字本聖經 請按此下載安裝Open Han 2024版字型，免得漏掉造字 |
| 9:1 | 掃羅見撒母耳 有一個便雅憫人，名叫基士，是便雅憫人亞斐亞的元孫，比歌拉的曾孫，洗羅的孫，亞別的子，是一個大氣力的勇士。 |
| 9:2 | 伊有一個子，名叫掃羅，勇壯、閣好生做，佇以色列中無一人會比得伊的好生做；身體比眾人卡高一個頭殼。 |
| 9:3 | 掃羅的老父基士拍見幾若隻驢母，基士給伊的子掃羅講：「你導一個奴僕起身去尋驢母。」 |
| 9:4 | 伊就經過以法蓮山地，及沙利沙的地，攏尋無；閣經過沙琳的地，也無佇遐；閣經過便雅憫的地，也尋無。 |
| 9:5 | 到蘇弗的地，掃羅給跟隨伊的奴僕講：「來啊，咱倒來去，驚了我的老父無掛慮驢，來煩惱咱。」 |
| 9:6 | 奴僕講：「看啊，此個城裡有一個上帝的奴僕，是人所尊重的，見伊所講的攏的確應驗。咱值著去伊遐，豈採伊會指示咱所行的路。」 |
| 9:7 | 掃羅給奴僕講：「咱若去，有甚麼通送彼人啊？因為咱袋仔內的食物攏了啦，也無禮物通送彼個上帝的奴僕，咱身邊猶有甚麼物無？」 |
| 9:8 | 奴僕閣應掃羅講：「我手裡有銀一舍客勒的四份一，我將此個來送彼個上帝的奴僕，請伊指示咱所行的路。」（ |
| 9:9 | 前以色列中，若有人去問上帝，就講：「咱來去見先見！」因為現今稱「先知」，前稱「先見」。） |
| 9:10 | 掃羅給奴僕講：「你所講的話好，來啊，咱來去。」𪜶就去上帝的人所𫢶的城。 |
| 9:11 | 𪜶上山坪欲入城，就抵著幾若個少年的查某囝仔出來汲水，問𪜶講：「先見佇遮無？」 |
| 9:12 | 查某囝仔應講：「是啦，佇遮，看啊，伊佇你的頭前。趕緊去！伊今仔日抵仔到城，因為今仔日百姓佇山頭壇獻祭。 |
| 9:13 | 佇伊猶未上去山頭壇欲食桌的代先，恁一下入城就會抵著伊；因為伊猶未到，百姓無代先食，的確聽候伊代先祝福祭物，然後所請的人客才食。今恁上去，此時會抵著伊。」 |
| 9:14 | 二人就上城；已經入城，撒母耳出來，欲上高的所在就抵著𪜶。 |
| 9:15 | 掃羅未到的前一日，耶和華已經啟示撒母耳講： |
| 9:16 | 「明仔再此時，我欲差一人對便雅憫地到你遮，你著給伊抹油做我的百姓以色列的頭。伊欲救我的百姓脫離非利士人的手；因為我的百姓哀求的聲透到我，我看顧𪜶。」 |
| 9:17 | 撒母耳看見掃羅的時，耶和華給伊講：「看啊，此人就是我所給你講的，伊欲管理我的百姓。」 |
| 9:18 | 掃羅佇城門裡倚近撒母耳，講：「請給我講，先見的厝佇叨落？」 |
| 9:19 | 撒母耳應掃羅講：「我就是先見。你佇我的頭前上去高的所在，因為恁今仔日欲及我食；明仔早起我欲互你去，你心內的事攏欲給你講。 |
| 9:20 | 你三日前拍見許個驢母，你免掛意，已經尋著啦。以色列眾人所欣慕的歸是誰啊？豈是歸你及你的老父的家嗎？」 |
| 9:21 | 掃羅應講：「我豈是便雅憫人以色列支派中極小可的嗎？便雅憫支派諸個家的中間我的家豈是極微細嗎？你啥事對我講此號話？」 |
| 9:22 | 撒母耳導掃羅及跟隨伊的人入客廳，互𪜶佇所請的人的中間坐大位；所請的約略有三十人。 |
| 9:23 | 撒母耳給廚房講：「我所交代你教你著收啲彼份今通捧來。」 |
| 9:24 | 廚房就捧彼腿及頂面所有的，下佇掃羅的面前，撒母耳講：「你看，此個所留的，你著提起來食。因為我請百姓的時，刁故意給你留啲到定著的日。」 彼日，掃羅就及撒母耳相及食。 |
| 9:25 | 撒母耳抹油掃羅做王 𪜶對高的所在落來入城，撒母耳及掃羅佇厝頂講話。 |
| 9:26 | 𪜶早早起來，拍昲光的時，撒母耳佇厝頂。叫掃羅講：「起來啊，我欲送你倒去。」掃羅就起來，伊及撒母耳二人出去外面。 |
| 9:27 | 𪜶落去到城的角頭，撒母耳給掃羅講：「著吩咐奴僕代先咱去（奴僕就去）。」閣講：「你且徛啲，我欲互你聽上帝的話。」 |