| 章節 | 台語漢字本聖經 請按此下載安裝Open Han 2024版字型，免得漏掉造字 |
| 6:1 | 送約櫃倒去 耶和華的約櫃住佇非利士人的地七月日久。 |
| 6:2 | 非利士人叫許個祭司及術士，講：「耶和華的約櫃咱著怎樣設法？請指示阮著怎樣送伊倒去本所在。」 |
| 6:3 | 𪜶講：「恁若送以色列上帝的約櫃去，通互伊空空去，的確著用補過失的祭還伊，恁才會得著好，也會知伊的手啥事無離開恁。」 |
| 6:4 | 𪜶講：「阮著用甚麼做補過失的祭來還伊啊？」應講：「著用金仔五個，金老鼠五隻，照非利士首領的數額，因為恁及恁的首領所抵著的災禍一樣。 |
| 6:5 | 所以恁著做恁的仔的像及毀傷恁的地老鼠的像，閣著歸榮光互以色列的上帝，豈採伊對佇恁及恁的上帝，及恁的地，會放輕伊的手。 |
| 6:6 | 恁啥事硬恁的心親像埃及人及法老硬𪜶的心啊？上帝佇𪜶中間行神蹟，𪜶豈無放百姓去，百姓就去嗎？ |
| 6:7 | 今恁著備辦一張新的車，及二隻有奶的牛母未曾掛軛的，將諸個牛縛佇車裡，也互牛仔子離開伊倒去𪜶厝。 |
| 6:8 | 用耶和華的約櫃下佇車裡，也用你所還金的寶物做補過失的祭的橐佇箱內，下佇櫃邊，送伊去。 |
| 6:9 | 恁著看：伊若對伊交界的路上到伯‧示麥，就降此個大災禍互咱的實在是伊；若無，就通知拍咱的是伊的手，是咱偶然抵著的。」 |
| 6:10 | 許個人就按呢行：將二隻有奶的牛母縛佇車裡，閣關牛仔子佇厝內， |
| 6:11 | 閣用耶和華的約櫃以及囥金老鼠及仔像的箱攏下佇車裡。 |
| 6:12 | 牛母直直向伯‧示麥的路去，對大路行愈行愈哮，無偏左右。非利士許個首領隨後面去，到伯‧示麥的境界。 |
| 6:13 | 抵抵伯‧示麥人佇山谷割麥，攑目看見約櫃，看見就歡喜。 |
| 6:14 | 車到伯‧示麥人約書亞的園，就停啲。佇遐有一塊大塊石磐，𪜶破車的柴，獻二隻牛母做燒祭互耶和華。 |
| 6:15 | 利未人將耶和華的約櫃及伊邊仔貯金的寶物的箱提落來，下佇彼塊大石磐的頂面。伯‧示麥人佇彼日獻燒祭及祭祀互耶和華。 |
| 6:16 | 非利士人五個首領看見，像彼日就倒去以革倫。 |
| 6:17 | 非利士人還互耶和華做補過失的祭的金仔，就是諸個：一粒為著亞實突，一粒為著迦薩，一粒為著亞實基倫，一粒為著迦特，一粒為著以革倫。 |
| 6:18 | 金老鼠的數額是照非利士的首領所管的城，就是堅固的城及鄉社，也續到大塊石磐。就是下耶和華的約櫃的，此塊石磐到今仔日猶佇伯‧示麥人約書亞的園。 |
| 6:19 | 約櫃佇基列‧耶琳 耶和華拍死伯‧示麥人因為𪜶看伊的約櫃內，就拍死𪜶七十人；五萬人百姓哀哭。因為耶和華大大拍死百姓。 |
| 6:20 | 伯‧示麥人講：「是誰會徛佇耶和華此個聖的上帝的面前啊？伊欲上去甚麼人遐來離開咱啊？」 |
| 6:21 | 對按呢差人去見基列‧耶琳徛起的百姓，講：「非利士人將耶和華的約櫃送倒來，恁落來扛上去恁遐。」 |