| 章節 | 台語漢字本聖經 請按此下載安裝Open Han 2024版字型，免得漏掉造字 |
| 5:1 | 約櫃佇非利士人中間 非利士人帶上帝的約櫃對以便以謝扛到亞實突。 |
| 5:2 | 非利士人將上帝的櫃扛入大袞的廟，下佇大袞的身邊。 |
| 5:3 | 隔早起，亞實突的人起來，看見大袞跋倒佇耶和華的櫃前，面仆佇地裡，就將大袞閣祀佇伊的原位。 |
| 5:4 | 閣隔日透早起來，看見大袞跋倒佇耶和華的櫃前，面仆佇地裡，閣大袞的頭及二支手掌攏折佇戶椗頂，只有剩大袞啒啒的身軀。（ |
| 5:5 | 為著按呢，大袞的祭司及一切入亞實突、大袞的廟的人攏無踏大袞的戶椗，直到今仔日。） |
| 5:6 | 耶和華的手重重拍亞實突人，敗壞𪜶，互𪜶發仔症。就是亞實突及伊的境內攏是按呢。 |
| 5:7 | 亞實突人看見按呢，就講：「以色列上帝的櫃通𫢶佇咱中間，因為伊的手重重拍咱及咱的上帝大袞」； |
| 5:8 | 就差人請非利士許個首領來聚集𪜶遐，講：「以色列上帝的櫃咱著怎樣設法啊？」𪜶應講：「通將以色列上帝的櫃運去迦特。」就將以色列上帝的櫃運到遐。 |
| 5:9 | 運到了後，耶和華的手攻擊彼個城，互彼個城的人真大亂，閣拍城內的人無論大細，𪜶攏發仔症。 |
| 5:10 | 𪜶就將上帝的櫃送到以革倫。上帝的櫃到以革倫，以革倫的人就喝講：「𪜶將以色列上帝的櫃運到咱遮，欲害死咱及咱的百姓！」 |
| 5:11 | 就差人聚集非利士攏總的首領，講：「以色列上帝的約櫃著送伊去互伊倒去本所在，免得伊害死咱及咱的百姓！」彼時通城有致到死的擾亂，因為上帝的手佇遐拍𪜶真重； |
| 5:12 | 無死的人攏抵著仔症。城中啼哭的聲，透到天裡。 |