| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 耶和華向撒母耳顯現 囝仔撒母耳佇以利的面前服事耶和華。當許個日，耶和華的話真稀罕，無常常有啟示。 |
| 3:2 | 一日，以利睏佇家己的所在；伊的目睭已經霧，看𣍐明。 |
| 3:3 | 上帝的燈猶未熄，撒母耳已經佇耶和華的殿，佇上帝的約櫃遐啲睏。 |
| 3:4 | 耶和華叫撒母耳。伊應講：「我佇遮！」 |
| 3:5 | 就走到以利遐，講：「我佇遮，因為你叫我。」以利講：「我無叫你，你倒去睏。」伊就去睏。 |
| 3:6 | 耶和華閣叫撒母耳。撒母耳起來，去以利遐，講：「我佇遮，因為你叫我。」伊應講：「我的子啊，我無叫你，通閣去睏。」 |
| 3:7 | 彼時撒母耳猶未識耶和華，耶和華的話未有啟示伊。 |
| 3:8 | 耶和華第三擺叫撒母耳。撒母耳起來，去以利遐，講：「我佇遮，因為你叫我。」以利才知是耶和華叫囝仔。 |
| 3:9 | 對按呢以利給撒母耳講：「你閣去睏；伊若閣叫你，你就講：『耶和華啊，請你講，你的奴僕聽！』」撒母耳就去，睏佇伊的所在。 |
| 3:10 | 耶和華閣來徛啲，親像前幾若擺叫：「撒母耳啊！撒母耳啊！」撒母耳應講：「請講，你的奴僕啲聽！」 |
| 3:11 | 耶和華給撒母耳講：「看啊，我佇以色列中欲行一項事，互聽見的人二個耳孔欲抖起來。 |
| 3:12 | 我論以利的家所講的，到彼日，頭到尾我欲應驗佇伊。 |
| 3:13 | 我曾給伊講我欲為著伊所知的罪永遠審判伊的家，因為伊的子家己招咒詛，伊也無禁止𪜶。 |
| 3:14 | 所以我有對以利的家咒誓講：『以利的家的罪過，雖然祭祀禮物，永遠𣍐會贖回。』」 |
| 3:15 | 撒母耳睏到天光，就開耶和華的殿門，撒母耳敢將異象給以利講。 |
| 3:16 | 以利叫撒母耳講：「我的子撒母耳啊！」伊應講：「我佇遮！」 |
| 3:17 | 以利講：「耶和華對你講甚麼？求你通隱瞞佇我；若將伊所給你講的對我隱密一句，願上帝加倍責罰你。」 |
| 3:18 | 撒母耳就將許個話攏給伊講，也無對伊隱瞞。以利講：「是耶和華，願伊照伊所看做好的來行。」 |
| 3:19 | 撒母耳漸漸大漢，耶和華及伊佇啲，互伊所講的無一句無應驗。 |
| 3:20 | 對但到別是巴所有的以色列人攏知撒母耳受設立做耶和華的先知。 |
| 3:21 | 耶和華閣佇示羅顯現；因為耶和華用耶和華的話佇示羅顯明佇撒母耳，撒母耳的話遍傳佇以色列眾人。 |