| 章節 | 台語漢字本聖經 請按此下載安裝Open Han 2024版字型，免得漏掉造字 |
| 5:1 | 底波拉及巴拉的歌 彼日，底波拉及亞比羅菴的子巴拉唱歌，講： |
| 5:2 | 因為以色列中做頭的，做頭導𪜶，
因為百姓甘願犧牲， 恁著謳咾耶和華！ |
| 5:3 | 列王啊，著聽！
諸個首領，著俯耳孔！ 我向耶和華我欲吟詩； 我欲唱歌謳咾耶和華──以色列的上帝。 |
| 5:4 | 耶和華啊，你對西珥出，
對以東地行來。 彼時地振動，天啲滴， 雲也滴水。 |
| 5:5 | 諸個山佇耶和華的面前搖泏，
就是此個西奈山佇耶和華──以色列上帝的面前搖泏。 |
| 5:6 | 佇亞拿的子珊迦的時，
閣佇雅億的日， 大路無人行， 行路的人攏是彎小路。 |
| 5:7 | 以色列中無頭人，攏總無，
到我底波拉起來， 到我起來佇以色列中做老母。 |
| 5:8 | 𪜶揀新的上帝，
交戰就到𪜶的城門。 彼時，以色列四萬人的中間 豈會看見盾牌及槍嗎？ |
| 5:9 | 我的心意向以色列許個設立律法者，
百姓中甘願犧牲者。 恁著謳咾耶和華！ |
| 5:10 | 騎白驢者、坐綉花毯仔者、行路者，
恁攏著報揚！ |
| 5:11 | 佇汲水的所在，離開射箭的人的聲遠遠，
佇遐人欲講起耶和華公義的所行， 就是伊治理以色列公義的所行。 彼時耶和華的百姓落去到城門。 |
| 5:12 | 底波拉啊，醒啊！醒啊！
你著醒，著醒，來唱歌。 巴拉啊，你著起來，亞比羅菴的子， 著掠你所掠的去。 |
| 5:13 | 彼時所剩的貴族及百姓相及落來；
耶和華為我臨到，攻擊勇士。 |
| 5:14 | 有對以法蓮來的，
伊的根本佇亞瑪力； 便雅憫參佇你的百姓中跟隨你。 有設律法者對瑪吉落來； 有攑枴點算百姓的數額者對西布倫落來； |
| 5:15 | 以薩迦的首領及底波拉相及來；
以薩迦及巴拉一樣。 𪜶隨伊走落平洋； 佇流便的溪邊心有大大斟酌議論。 |
| 5:16 | 你啥事坐佇羊的中央
聽叫羊群的聲啊？ |
| 5:17 | 基列徛起佇約但彼旁。
但啥事停佇船裡？ 亞設靜靜坐佇海邊， 𫢶佇港內。 |
| 5:18 | 西布倫是拼命拋死的百姓；
及拿弗他利佇田野高的所在也是按呢。 |
| 5:19 | 列王來交戰。
彼時迦南列王佇米吉多水邊的他納交戰， 總是無搶著銀。 |
| 5:20 | 有對天交戰的，
星辰對𪜶的軌道來及西西拉交戰。 |
| 5:21 | 基順河給𪜶流去，
基順河就是古早的河； 我的神啊，你奮勇進前去。 |
| 5:22 | 馬蹄硞硞哮，是因為緊緊走，
就是力者有緊緊走。 |
| 5:23 | 耶和華的使者講：
著咒詛米羅斯， 大大咒詛其中徛起的百姓； 因為𪜶無來幫助耶和華， 無來幫助耶和華抵敵勇士。 |
| 5:24 | 基尼人希百的某雅億，比許個婦仁人卡有福氣，
比徛起布棚內的婦仁人卡有福氣。 |
| 5:25 | 西西拉討水，
伊就用奶互伊 用寶貝的盤捧牛奶油互伊。 |
| 5:26 | 雅億伸手攑釘，
正手攑做工人的鎚仔， 用鎚摃西西拉， 釘過伊的頭殼， 鑿來透過伊的鬢邊， |
| 5:27 | 佇伊的腳的中間，西西拉仆落去，扼落去，倒啲，
佇伊的腳的中間仆落，扼落去； 佇所仆落的所在，扼落去來死。 |
| 5:28 | 西西拉的老母對窗仔看出去，
對窗仔子裡叫講： 怎樣伊的車慢慢來？ 怎樣伊的車輪許延迁啊？ |
| 5:29 | 跟隨伊聰明尊貴的婦女應伊，
伊也家己應講： |
| 5:30 | 豈無所得著嗎？豈無分所搶的物嗎？
逐人分一二個查某囝仔？ 西西拉就分所搶彩色的衫， 所搶綉花彩色的衫， 二面攏是彩色綉花的， 通掛佇頷頸做所搶的物。 |
| 5:31 | 耶和華啊，
願你的對敵攏親像按呢滅無！ 願疼他的人親像日出，光爁爁！ 以後，地方太平四十年。 |