| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 猶大及西緬支派掠著亞多尼‧比色 約書亞死了後，以色列人問耶和華講：「是誰著做頭上去給阮攻擊迦南人，及𪜶交戰？」 |
| 1:2 | 耶和華講：「猶大著上去，看啊，我已經將彼個地交佇伊的手。」 |
| 1:3 | 猶大對伊的兄西緬講：「請你及我上去到我所拈著的地，及迦南人交戰；我也欲及你去到你所拈著的地。」西緬就及伊去。 |
| 1:4 | 猶大就上去；耶和華將迦南人及比利洗人交佇𪜶的手。𪜶佇比色拍死𪜶一萬人， |
| 1:5 | 閣佇比色抵著亞多尼‧比色，及伊交戰，刣贏迦南人及比利洗人。 |
| 1:6 | 亞多尼‧比色逃走；𪜶追趇伊，掠著伊，剉斷伊的手伊的腳的大哺拇。 |
| 1:7 | 亞多尼‧比色講：「前有七十個王，手及腳的大哺拇攏剉起來，佇我的桌腳拾食物。今上帝照我所行的報應我。」𪜶帶伊到耶路撒冷，伊就死佇遐。 |
| 1:8 | 猶大支派攻取耶路撒冷及希伯崙 猶大人攻擊耶路撒冷，取伊，用刀刣死𪜶，閣放火燒城。 |
| 1:9 | 後來猶大人落去，及𫢶佇山地、南勢的地，平洋的地的迦南人交戰。 |
| 1:10 | 猶大閣去拍許個徛起希伯崙的迦南人，刣死示篩、亞希幔、撻買。希伯崙前名叫基列‧亞巴。 |
| 1:11 | 俄陀聶攻取底璧城 ( 書 15:13-19 ) 伊對遐去拍底璧徛起的百姓；底璧前名叫基列‧西弗。 |
| 1:12 | 迦勒講：「若有人拍基列‧西弗來取伊，我欲將我的查某子押撒互伊做某。」 |
| 1:13 | 迦勒的小弟基納斯的子俄陀聶取伊，伊就將伊的查某子押撒互伊做某。 |
| 1:14 | 押撒過門的時，勸丈夫對𪜶老父討一區田。押撒對驢落來，迦勒問伊講：「你欲甚麼啊？」 |
| 1:15 | 伊對伊講：「求你賜福我，你已經安置我佇南方的地，求你互我水泉。」迦勒就用頂的水泉下的水泉互伊。 |
| 1:16 | 猶大及便雅憫支派的勝利 摩西的外戚是基尼人，伊的子孫及猶大的子孫對棗樹城相及上去，到亞拉得南勢猶大的曠野，及百姓相及徛起。 |
| 1:17 | 猶大及伊的兄西緬相及去，拍死徛起佇洗法的迦南人，一盡毀滅伊，彼個城就名叫何珥瑪。 |
| 1:18 | 猶大閣取加薩及伊的境界，亞實基倫及伊的境界，以革倫及伊的境界。 |
| 1:19 | 耶和華及猶大相及佇啲，伊就趕出山地徛起的百姓，總是𣍐會趕出平洋徛起的百姓，因為𪜶有鐵車。 |
| 1:20 | 𪜶照摩西所講的，用希伯崙互迦勒；伊就對遐趕出亞納三個子。 |
| 1:21 | 便雅憫人無趕出徛起佇耶路撒冷的耶布斯人。耶布斯人猶原佇耶路撒冷及便雅憫人相及徛起，到今仔日。 |
| 1:22 | 以法蓮及瑪拿西支派攻取伯特利 約瑟家也上去攻擊伯特利；耶和華及𪜶相及佇啲。 |
| 1:23 | 約瑟家差人去偷看伯特利（彼個城頭先名叫路斯）。 |
| 1:24 | 做偵探的看見一人對城內出來，就對伊講：「求你用入城的路報阮知，阮欲好款待你。」 |
| 1:25 | 彼人就報𪜶入城的路，𪜶就用刀拍死城內的百姓，獨獨放彼人及伊全家去。 |
| 1:26 | 彼人去赫人的地，起一座城，號名叫路斯。到今仔日猶叫此個名。 |
| 1:27 | 以色列人無趕出的百姓 瑪拿西也無趕出伯‧善及伊的鄉社的百姓，他納及伊的鄉社的百姓，多珥及伊的鄉社的百姓，以伯蓮及伊的鄉社的百姓，米吉多及伊的鄉社的百姓；迦南人就決意徛起佇許個地方。 |
| 1:28 | 到以色列強盛，就互迦南人做苦工，無一盡趕𪜶出。 |
| 1:29 | 以法蓮也無趕出徛起佇基色的迦南人。迦南人就佇𪜶中間，猶原徛起佇基色。 |
| 1:30 | 西布倫也無趕出基倫的百姓及拿哈拉的百姓。迦南人就猶原徛起佇𪜶中間，來做苦工。 |
| 1:31 | 亞設也無趕出亞柯徛起的百姓及西頓、亞黑拉、亞革悉、黑巴、亞弗革、利合徛起的百姓。 |
| 1:32 | 亞設人住佇徛起彼所在迦南人的中間，因為無趕𪜶出去。 |
| 1:33 | 拿弗他利無趕出伯‧示麥徛起的百姓、伯‧亞納徛起的百姓，拿弗他利就住佇徛起彼所在迦南人的中間；總是伯‧示麥及伯‧亞納徛起的百姓攏做苦工。 |
| 1:34 | 亞摩利人強迫但的人徛起佇山地，無容允𪜶落去平洋； |
| 1:35 | 亞摩利人就決意徛起佇希烈山佇亞雅倫佇沙賓。後來約瑟家強盛，互𪜶做苦工。 |
| 1:36 | 亞摩利人的地界，是對亞克拉濱山坪，對西拉上去。 |