| 章節 | 台語漢字本聖經 請按此下載安裝Open Han 2024版字型，免得漏掉造字 |
| 23:1 | 約書亞的遺言 耶和華已經互以色列人安靜，無及四圍一切的對敵交戰，已經歷過多多日。約書亞也歲壽多年老， |
| 23:2 | 彼時約書亞就叫以色列眾人，𪜶的長老，及𪜶的族長，𪜶的審判官，𪜶的官長攏總來，對𪜶講：「我已經歲壽多年老。 |
| 23:3 | 耶和華──恁的上帝因為恁的緣故，對許個國所行一切的事，恁有看見，因為替恁交戰的是耶和華──恁的上帝。 |
| 23:4 | 所剩諸個國，以及我所剪除許個國，對約但到大海向日落的所在，我已經分互恁逐支派做業。 |
| 23:5 | 耶和華──恁的上帝欲對恁的面前趕逐𪜶，也欲對恁的頭前革逐𪜶，恁就欲得著𪜶的地做業，照耶和華──恁的上帝所對恁講的。 |
| 23:6 | 所以，恁著大大壯膽，執守來行摩西律法的冊一切所記載的，通離開伊來偏左偏右。 |
| 23:7 | 佇恁中間所剩許個國，恁通及伊參插。通提起𪜶許個上帝的名，通互人指𪜶來咒誓，也通服事伊，通跪拜伊； |
| 23:8 | 總是著照恁到今仔日所行的，結聯耶和華──恁的上帝。 |
| 23:9 | 因為耶和華已經用大閣強的國對恁的面前趕出；到今仔日，無一人會徛住佇恁的面前。 |
| 23:10 | 恁一人欲趕逐一千人，因為替恁交戰的，是耶和華──恁的上帝，照伊所對恁講的。 |
| 23:11 | 恁著大大家己謹慎，疼耶和華──恁的上帝。 |
| 23:12 | 恁若略仔倒退，及存佇恁中間所剩許個百姓結聯，及𪜶結親，相及往來， |
| 23:13 | 恁著確實知，耶和華──恁的上帝的確無欲閣將許個百姓對恁的面前趕出；總是𪜶欲成做恁的羅網、活罩、拍恁身軀的箠、目睭內的茦，直到恁對佇耶和華──恁上帝所賞賜恁此個好的地滅無。 |
| 23:14 | 「看啊，我今仔日欲行世間人所著行的路。恁一心一意知耶和華──恁上帝所應允賜福恁的話無一句落空，攏應驗佇恁的身上，其中無落空一項。 |
| 23:15 | 耶和華──恁上帝所應允一切的福氣怎樣臨到恁的，耶和華也欲照按呢互逐樣的災禍到佇恁，直到伊滅無恁佇耶和華──恁上帝所賞賜恁此個好的地。 |
| 23:16 | 恁若違背耶和華──恁上帝所命令恁的約，去服事別個上帝，跪拜伊，耶和華的受氣欲對恁發出，恁欲緊緊滅無佇伊所賞賜恁好的地。」 |