| 章節 | 台語漢字本聖經 請按此下載安裝Open Han 2024版字型，免得漏掉造字 |
| 18:1 | 剩的土地的分配 以色列人的全會攏聚集佇示羅，搭會幕佇遐，因為地方已經互𪜶卡贏。 |
| 18:2 | 以色列人中猶有七支派未得著𪜶的業。 |
| 18:3 | 約書亞對以色列人講：「耶和華──恁列祖的上帝所賞賜恁的地，恁延迁去取伊，欲到底時啊？ |
| 18:4 | 恁逐支派著揀三人，我欲差𪜶去，𪜶就起身遍行彼個地，照𪜶的份額畫圖，就倒來我遮。 |
| 18:5 | 𪜶著將地分做七份；猶大猶原佇南方，𫢶佇伊的境內。約瑟家猶原佇北方，𫢶佇伊的境內。 |
| 18:6 | 恁著將地分做七份，畫圖提來我遮。我就欲佇耶和華──咱上帝的面前，給恁拈鬮。 |
| 18:7 | 獨獨利未人佇恁中間無份，因為耶和華祭司的職就是𪜶的業。迦得、流便，及瑪拿西半支派已經佇約但彼旁東勢得著地做業，就是耶和華的奴僕摩西所互𪜶的。」 |
| 18:8 | 許個人起身去，約書亞命令許個去欲畫地圖的人講：「恁去遍行彼個地，畫圖倒轉來我遮。我欲佇示羅遮，耶和華的面前，給恁拈鬮。」 |
| 18:9 | 𪜶就去，遍行彼個地，照𪜶的城畫做七份，記佇冊裡，倒轉到示羅的營中見約書亞。 |
| 18:10 | 約書亞就佇示羅，耶和華的面前，給𪜶拈鬮。約書亞佇遐，分地互以色列人，照𪜶的宗族。 |
| 18:11 | 分互便雅憫支派的土地 給便雅憫的支派，拈鬮照𪜶的宗族所得著的地，彼個界是佇猶大的子孫、約瑟的子孫的中間。 |
| 18:12 | 𪜶北旁的界是對約但河起，伊的界上去到耶利哥邊仔的北勢；閣上去，𨃟過山向西勢去，直直到伯‧亞文的曠野； |
| 18:13 | 彼個界對遐去到路斯，到路斯南勢的邊仔（路斯就是伯特利），伊的界閣落去到亞他綠‧亞達，倚近下面的伯‧和崙南旁的山； |
| 18:14 | 伊的界對西勢，越落南，對伯‧和崙頭前南勢的山，直到猶大人的城基列‧巴力（就是基列‧耶琳）；這是𪜶西勢的界。 |
| 18:15 | 南旁是對基列‧耶琳的極頭起，伊的界對西勢出到尼弗多亞的水泉； |
| 18:16 | 伊的界閣落去到便欣嫩山谷對面的山邊，就是利乏音山谷北勢的山；閣落去到欣嫩山谷，到耶布斯的南旁；閣落去到隱‧羅結； |
| 18:17 | 閣對北勢出去到隱‧示麥，出去到亞都冥山坪對面的基利綠；閣落去到流便的子波罕的石磐； |
| 18:18 | 閣去亞拉巴對面北勢的邊仔，落去到亞拉巴； |
| 18:19 | 伊的界到伯‧曷拉北勢的邊仔，此個界直直到鹽海北旁的海灣，就是約但南勢的河口；這是伊南旁的界。 |
| 18:20 | 東旁的界到約但河。這是便雅憫人的業照𪜶的宗族，𪜶四圍的交界。 |
| 18:21 | 便雅憫的支派照𪜶的宗族所得著的城就是：耶利哥、伯‧曷拉、伊麥‧基悉、 |
| 18:22 | 伯‧亞拉巴、洗瑪臉、伯特利、 |
| 18:23 | 亞文、巴拉、俄弗拉、 |
| 18:24 | 基法‧阿摩尼、俄弗尼、迦巴，共十二座城，及伊的鄉社； |
| 18:25 | 閣有基遍、拉瑪、比錄、 |
| 18:26 | 米斯巴、基非拉、摩撒、 |
| 18:27 | 利堅、伊利毗勒、他拉拉、 |
| 18:28 | 洗拉、以利弗、耶布斯（就是耶路撒冷）、基比亞、基列，共十四座城，及伊的鄉社。這是便雅憫人所得著的業，照𪜶的宗族。 |