| 章節 | 台語漢字本聖經 請按此下載安裝Open Han 2024版字型，免得漏掉造字 |
| 26:1 | 奉獻頭水熟的土產 「你已經到耶和華──你的上帝所賞賜你做業的地承接來徛起伊， |
| 26:2 | 就著對耶和華──你的上帝賞賜你的地，將所收逐項起頭熟的土產提淡薄，下佇筐裡，去耶和華──你上帝所欲揀安置伊的名的所在， |
| 26:3 | 著去見當時做祭司的，給伊講：『我今仔日對耶和華──你的上帝講明，我已經到耶和華對咱的列祖咒誓賞賜咱的地。』 |
| 26:4 | 祭司就對你的手接彼筐來，下佇耶和華──你上帝的壇前。 |
| 26:5 | 你著佇耶和華──你上帝的面前講：『我的祖是一個啲欲死的亞蘭人，落去埃及寄腳佇遐。人額少少，佇遐成做一國大閣強、人額閣多。 |
| 26:6 | 埃及人歹款待阮，苦楚阮，用苦工教阮做。 |
| 26:7 | 對彼霎阮哀求耶和華──阮列祖的上帝，耶和華聽阮的聲，看見阮的苦楚、阮的著磨、阮的壓迫， |
| 26:8 | 耶和華就用大權能的手及伸出的手骨，及大通驚的事及神蹟奇事，導阮出埃及， |
| 26:9 | 閣導阮到此所在，用此個地賞賜阮，就是流奶及蜜的地。 |
| 26:10 | 看啊，此個地起頭熟的，耶和華啊，你所賞賜我的，我今已經帶來。』後來你著將伊下佇耶和華──你上帝的面前，佇耶和華──你上帝的面前敬拜伊。 |
| 26:11 | 你及利未人，以及恁中間的出外人，著因為耶和華──你上帝所賞賜你及你的家眷一切的福份來歡喜。 |
| 26:12 | 「逐擺到第三年，就是十份抽一份的年，你抽一切的土產十份的一份，分互利未人及出外人，及孤兒寡婦，互𪜶佇你的城門通得著食飽。 |
| 26:13 | 你閣著對耶和華──你上帝的面前講：『我已經對我的家提出聖物，續互利未人及出外人，及孤兒寡婦，是照你所命令我一切的誡命。你的誡命我攏無犯著，也無𣍐記得。 |
| 26:14 | 居喪的時，我未曾食伊；無清氣的時，我未曾提起來，也無用伊做死人的路用。我聽趁耶和華──我上帝的話，攏照你一切所命令我的來行。 |
| 26:15 | 求你對天裡、對你徛起的聖所俯落看，賜福你的百姓以色列及你所賞賜阮的地，照你所對阮的列祖咒誓的，就是流奶及蜜的地。』」 |
| 26:16 | 屬主的百姓 「今仔日耶和華──你的上帝命令你行諸個律例法度，所以你著盡心盡性執守來行伊。 |
| 26:17 | 今仔日你承認耶和華做你的上帝，允欲行伊的道路，守伊的律例、誡命、法度，聽趁伊的話。 |
| 26:18 | 耶和華今仔日也承認你做伊家己特別的百姓，照伊所應允你的，互你守伊一切的誡命， |
| 26:19 | 閣互你對佇榮光、名聲、尊貴，𨃟過伊所創造萬國的百姓，互你歸佇耶和華──你的上帝做聖潔的百姓，照伊所講的。」 |