| 章節 | 台語漢字本聖經 請按此下載安裝Open Han 2024版字型，免得漏掉造字 |
| 24:1 | 巴蘭看見耶和華歡喜賜福互以色列，就無親像往擺去尋法術，是面向曠野。 |
| 24:2 | 巴蘭攑目，看見以色列人照支派徛起。上帝的神就臨到伊， |
| 24:3 | 伊就提起伊的歌講：
比珥的子巴蘭講， 目睭合啲的人講， |
| 24:4 | 聽見上帝的話，
看見全能者的異象， 目睭展開倒啲的人講： |
| 24:5 | 雅各啊，你的布棚怎樣許媠？
以色列啊，你的帳房怎樣許好看！ |
| 24:6 | 親像相連續的山谷，
親像河邊的園， 親像耶和華所栽的沈香樹， 親像水邊的柏香樹。 |
| 24:7 | 水欲對伊的桶流出；
種子欲撒佇多多水的所在。 伊的王欲𨃟過亞甲； 伊的國欲興起。 |
| 24:8 | 上帝導伊出埃及；
伊親像有野牛的力。 伊欲吞食對敵的國， 遏折𪜶的骨頭， 用箭射𪜶到𥦁過。 |
| 24:9 | 伊撐腳閣倒啲親像公的獅，
也親像母的獅，是誰敢惹著伊？ 見若祝福你的，願伊受祝福； 見若咒詛你的，願伊受咒詛。 |
| 24:10 | 巴勒大受氣巴蘭，就搭手，巴勒閣給巴蘭講：「我叫你來咒詛我的對敵，你竟然專專祝福𪜶到此三擺。 |
| 24:11 | 今你走去本所在！我本想欲互你得著大尊貴，若是耶和華阻擋互你無得著尊貴。」 |
| 24:12 | 巴蘭對巴勒講：「我豈無對你所差到我遐的使者講： |
| 24:13 | 『巴勒就若將伊滿厝的金銀互我，我也𣍐得𨃟過耶和華的命令，憑家己的心來做好做歹。耶和華所講的，我就講伊。』」 |
| 24:14 | 巴蘭尾擺預言 「看啊，今我欲倒去本族。你來，我給你講諸個百姓日後欲怎樣款待你的百姓。」 |
| 24:15 | 伊就提起伊的歌講：
比珥的子巴蘭講： 目睭合啲的人講， |
| 24:16 | 聽見上帝的話，
得著知至高者的知識， 看見全能者的異象， 目睭展開倒啲的人講： |
| 24:17 | 我看伊總是無佇現時；
我觀看伊總是是近近。 有一粒星欲對雅各出，有一個權柄欲對以色列興起， 欲拍破摩押的邊角，毀壞擾亂的人。 |
| 24:18 | 以東欲做業，
西珥也欲做業互伊的對敵； 以色列欲行代誌勇敢。 |
| 24:19 | 有一位掌權的，欲對雅各出；
伊欲剿滅城中所留的。 |
| 24:20 | 伊閣看見亞瑪力，就提起伊的歌講：
亞瑪力本做諸個國的頭， 總是伊的結局欲永永滅無。 |
| 24:21 | 伊閣看基尼人，就提起伊的歌講：
你徛起的所在是堅固； 你做巢佇山巖。 |
| 24:22 | 總是基尼欲致到衰微，
直到互亞述掠你去。 |
| 24:23 | 伊閣提起歌講：
哀啊！上帝行此個事的時，是誰會得著活？ |
| 24:24 | 欲有船對基提遐來，
苦楚亞述，苦楚希伯； 伊也欲永永滅無。 |
| 24:25 | 巴蘭就起來，倒去伊本所在，巴勒也行伊的路。 |