| 章節 | 台語漢字本聖經 請按此下載安裝Open Han 2024版字型，免得漏掉造字 |
| 15:1 | 上帝及亞伯蘭立約 諸個代誌了後，耶和華的話佇異象中臨到亞伯蘭講：「亞伯蘭啊，你免驚！我是你的盾牌，是你極大的報賞。」 |
| 15:2 | 亞伯蘭講：「主耶和華啊！你欲互我甚麼？我已經無子，承接我的家業的就是大馬色人以利以謝。」 |
| 15:3 | 亞伯蘭閣講：「你無互我有後裔；彼個生佇我家內的是我的後嗣。」 |
| 15:4 | 耶和華閣臨到給伊講：「此人是欲做你的後嗣；對你本身出的才是做你的後嗣。」 |
| 15:5 | 就導伊出去外面，講：「你看天，算許個星，你算會了抑𣍐？」閣對伊講：「你的後裔亦欲親像按呢。」 |
| 15:6 | 亞伯蘭信耶和華，伊就給伊算做義。 |
| 15:7 | 閣對伊講：「我是耶和華，曾導你出迦勒底的珥城，為著欲將此個地互你做業。」 |
| 15:8 | 亞伯蘭講：「主耶和華啊，我怎樣會知欲得著此個地做業啊？」 |
| 15:9 | 伊給伊講：「你給我取一隻三年母的牛，一隻三年母的山羊，一隻三年公的綿羊，一隻鳩鵻，一隻鴿仔。」 |
| 15:10 | 伊就取諸個物來，逐樣對中破開做二旁，此旁及彼旁排相對，只有鳥無破開。 |
| 15:11 | 有鷹鳥落來，佇死的精牲的頂面，亞伯蘭就趕伊去。 |
| 15:12 | 日欲落的時，亞伯蘭睏重眠；忽然有真黑暗的大驚惶到佇伊。 |
| 15:13 | 耶和華對亞伯蘭講：「你的確著知，你的後裔欲出外佇別人的地，閣服事彼位的人；彼位的人欲苦楚𪜶四百年。 |
| 15:14 | 𪜶所欲服事的國，我欲辦𪜶，後來𪜶欲帶多多財物對遐出來。 |
| 15:15 | 你欲安然倒祖，食長歲壽，互人埋葬。 |
| 15:16 | 到第四代，𪜶欲倒來遮，因為亞摩利族的罪猶未貫滿。」 |
| 15:17 | 日落天暗，有出煙的爐及啲𤏸的火把對許個破旁的肉經過。 |
| 15:18 | 當彼日，耶和華及亞伯蘭立約，講：「我有將此個地，對埃及河到彼個大河，就是伯拉河，互你的後裔， |
| 15:19 | 就是基尼、基尼洗、甲摩尼、 |
| 15:20 | 赫、比利洗、利乏音、 |
| 15:21 | 亞摩利、迦南、革迦撒、耶布斯諸個族的地。」 |