| 章節 | 台語漢字本聖經 請按此下載安裝Open Han 2024版字型，免得漏掉造字 |
| 13:1 | 亞伯蘭及羅得分手 亞伯蘭對埃及上去，伊及伊的某及伊所有的連羅得，攏去南地。 |
| 13:2 | 亞伯蘭的牛、銀、金真多。 |
| 13:3 | 伊對南地漸漸去伯特利，到伯特利及艾的中間，早前搭布棚的所在， |
| 13:4 | 到伊起頭起壇的所在；亞伯蘭佇遐求叫耶和華的名。 |
| 13:5 | 及亞伯蘭同行的羅得亦有羊群、牛群、布棚。 |
| 13:6 | 彼個地就𣍐容允得𪜶相及徛；因為𪜶的財物多，𪜶才𣍐會相及徛。 |
| 13:7 | 亞伯蘭的牧者及羅得的牧者相爭。當時迦南人及比利洗人佇彼個地徛起。 |
| 13:8 | 亞伯蘭給羅得講：「你我通冤家，你的牧者及我的牧者亦通冤家，因為咱是骨肉的親。 |
| 13:9 | 全地豈無佇你的目睭前嗎？請你離開我：你倒旁，我就正旁；你正旁，我就倒旁。」 |
| 13:10 | 羅得攑目看約但河一片的平洋，直到瑣珥的路，攏真潤澤，彼個地佇耶和華未滅所多瑪、蛾摩拉以前親像耶和華的園，也親像埃及的地。 |
| 13:11 | 對按呢羅得揀約但河一片的平洋，遷徙去東勢；𪜶就大家分開。 |
| 13:12 | 亞伯蘭徛起迦南地，羅得徛起平洋諸個城，徙伊的布棚到所多瑪。 |
| 13:13 | 所多瑪人極歹大大得罪耶和華。 |
| 13:14 | 亞伯蘭徙去希伯崙 羅得離別了後，耶和華對亞伯蘭講：「你攑目對你所𫢶的所在，向東西南北來看； |
| 13:15 | 因為你所看見一切的地，我攏欲互你及你的後裔，直到永遠。 |
| 13:16 | 我亦欲互你的後裔親像地上的土沙，人若會算地上的土沙才會算你的後裔。 |
| 13:17 | 你起來，遍行此個地的橫直，因為我欲將此個地互你。」 |
| 13:18 | 亞伯蘭就搬徙布棚，到希伯崙倚幔利許個橡樹徛起；佇遐為耶和華起一座壇。 |