| 章節 | 台語漢字本聖經 請按此下載安裝Open Han 2024版字型，免得漏掉造字 |
| 20:1 | 處罰悖逆的人 耶和華吩咐摩西講： |
| 20:2 | 「你著閣對以色列人講：見若以色列人，抑是佇以色列中寄腳的外人，用家己的子兒獻互摩洛的，的確著互伊死；彼地方的人著用石頭擲死伊。 |
| 20:3 | 我也欲對彼人變面，對伊的百姓中剪除伊；因為伊用子兒獻互摩洛，染垃墋我的聖所，褻瀆我的聖名。 |
| 20:4 | 彼人用子兒獻互摩洛，彼所在的人若佯做無看見，也無互伊死， |
| 20:5 | 我欲對彼人及伊的家變面，將伊及一切隨伊行邪淫的就是及摩洛行邪淫的攏對伊的百姓中剪除伊。 |
| 20:6 | 「人偏向互鬼上身者及行邪術的，隨𪜶行邪淫，我欲對彼人變面，對伊的百姓中剪除伊。 |
| 20:7 | 所以恁著家己聖來成聖，因為我是耶和華──恁的上帝。 |
| 20:8 | 恁著守我的律例來行伊；我是互恁成聖的耶和華。 |
| 20:9 | 見若咒詛老父抑是老母者，的確著互伊死；伊咒詛老父抑是老母，伊的罪著歸佇伊的身上。 |
| 20:10 | 「及別人的某行淫就是及伊厝邊的某行淫的，姦夫淫婦的確著互𪜶死。 |
| 20:11 | 人及後母私通的，就是凌辱伊的老父，𪜶二人的確著互𪜶死，𪜶的罪歸佇𪜶。 |
| 20:12 | 人及媳婦私通的，的確著互𪜶二人攏死；𪜶行逆倫的事，𪜶的罪歸佇𪜶。 |
| 20:13 | 人若及查甫人交合，親像及婦仁人一樣，𪜶二人行可惡的事，的確著互𪜶死，𪜶的罪歸佇𪜶。 |
| 20:14 | 人若娶某，續娶某的老母，就是極歹，此三人著用火燒𪜶，免得恁中間有此號歹。 |
| 20:15 | 人及獸交合，伊的確著死，彼隻獸也著刣死。 |
| 20:16 | 婦仁人親近獸，及伊交合，你著刣死彼個婦仁人及獸，的確著互𪜶死，𪜶的罪歸佇𪜶。 |
| 20:17 | 「人若牽伊的姊妹，無論同父抑是同母的，伊看伊的下體，伊看伊的下體，這是見誚的事；𪜶著佇伊的百姓的目睭前受剪除。伊有露現伊的姊妹的下體，著擔當伊的罪。 |
| 20:18 | 婦仁人經期到，人及伊同房，露現伊的下體，伊有露現婦仁人的血源，婦仁人也有露現伊的血源，𪜶二個著對𪜶的百姓中受剪除。 |
| 20:19 | 老母的姊妹抑是老父的姊妹，通露現𪜶的下體，就是凌辱骨肉的親；𪜶著擔當𪜶的罪。 |
| 20:20 | 人若私通伊的嬸姆，就是凌辱伊的叔伯；𪜶欲擔當𪜶的罪，一世人無子。 |
| 20:21 | 人娶兄弟的某，這是垃墋的事，伊有凌辱伊的兄弟；𪜶的確無子。 |
| 20:22 | 「所以恁著守我一切的律例及我一切的法度來行伊，免得我所導恁去𫢶的地將恁吐出。 |
| 20:23 | 我佇恁的面前所趕出的百姓，恁通趁𪜶的風俗，因為𪜶行諸個一切的事，所以我厭惡𪜶。 |
| 20:24 | 總是我曾對恁講，恁欲承接𪜶的地，我欲用彼個賞賜恁做業，就是流奶及蜜的地。我是耶和華──恁的上帝，對萬百姓的中間分別恁。 |
| 20:25 | 所以，恁著分別清氣及無清氣的獸；無清氣及清氣的鳥隻，或是獸，或是禽，或是爬佇地裡攏總的活物，我所給恁分別做無清氣的，恁通為著𪜶致到家己做通厭惡的。 |
| 20:26 | 恁著歸佇我來做聖，因為我──耶和華是聖，對萬百姓的中間分別恁，來歸佇我。 |
| 20:27 | 「無論男女，有鬼上身抑是行邪術的，的確著互伊死。人著用石頭給𪜶擲死，𪜶的罪歸佇𪜶。」 |