| 章節 | 台語漢字本聖經 請按此下載安裝Open Han 2024版字型，免得漏掉造字 |
| 12:1 | 上帝呼召亞伯蘭 耶和華對亞伯蘭講：「你著離開本地、本族、老父的家，去我所欲指示你的地。 |
| 12:2 | 我欲互你成做大國。我欲賜福你，互你的名做大；你亦欲互人得著福氣。 |
| 12:3 | 祝福你的，我欲賜福互𪜶；咒詛你的，我欲責罰伊。地上萬族欲因為你得著福氣。」 |
| 12:4 | 亞伯蘭照耶和華吩咐的話就去；羅得亦及伊去。亞伯蘭出哈蘭的時七十五歲。 |
| 12:5 | 亞伯蘭帶伊的某撒萊及伊的姪仔羅得，以及𪜶佇哈蘭所積聚的財物、所得著的人額，𪜶就出去欲去迦南地。𪜶就到迦南地。 |
| 12:6 | 亞伯蘭經過彼個地，到佇示劍的所在、到摩利的橡樹。彼時迦南族猶啲住。 |
| 12:7 | 耶和華對亞伯蘭出現講：「我欲將此個地方賞賜你的後裔。」伊就佇遐為著對伊出現的耶和華起一座壇。 |
| 12:8 | 對遐伊徙到伯特利東勢的山，搭布棚；西勢是伯特利，東勢是艾。佇遐為著耶和華起一座壇，求叫耶和華的名。 |
| 12:9 | 亞伯蘭漸漸徙去南勢的地。 |
| 12:10 | 亞伯蘭到埃及 彼個地抵著飢荒。亞伯蘭落去埃及，欲佇遐暫時徛起，因為彼個地飢荒真大。 |
| 12:11 | 將近入埃及，就對伊的某撒萊講：「我知你是面貌好看的婦仁人。 |
| 12:12 | 埃及人看見你的時欲講：『此個是伊的某』，𪜶欲刣死我，來留你活啲。 |
| 12:13 | 求你著講，你是我的小妹，互我因為你得著平安；我的生命亦對你來得著活。」 |
| 12:14 | 亞伯蘭到埃及的時，埃及人看見彼個婦仁人極其媠。 |
| 12:15 | 法老的人臣看見伊，就對法老謳咾伊。彼個婦仁人就互人帶伊入法老的王宮。 |
| 12:16 | 法老因為此個婦仁人就好款待亞伯蘭，亞伯蘭就得著羊、牛、公的驢、奴僕、女婢、母的驢、以及駱駝。 |
| 12:17 | 耶和華因為亞伯蘭的某撒萊的緣故，降大災禍佇法老及伊全家。 |
| 12:18 | 法老就叫亞伯蘭來，講：「你對我所做的是甚麼事？啥事無給我講伊是你的某？ |
| 12:19 | 啥事稱伊做小妹，致到我將伊娶來做我的某？今你的某佇遮，通導伊做你去。」 |
| 12:20 | 對彼霎法老為著伊來吩咐人，𪜶就將伊及伊的某及伊所有的，攏送伊去。 |