| 章節 | 台語漢字本聖經 請按此下載安裝Open Han 2024版字型，免得漏掉造字 |
| 16:1 | 上帝大受氣的碗 我聽見有大聲對殿裡出，給七個天使講：「恁去，將許個貯上帝大受氣的七個碗傾佇地裡。」 |
| 16:2 | 頭一個就去，將伊的碗傾佇地裡，就有惡毒的瘡生佇許個有獸的記號者，及拜伊的像者。 |
| 16:3 | 第二個將伊的碗傾佇海裡，海就變做親像死人的血，海中的活物一盡死。 |
| 16:4 | 第三個將伊的碗傾佇江河及諸個水泉，水就變做血。 |
| 16:5 | 我聽見掌諸個水的天使講：
現在佇啲、早佇啲、聖者啊， 你是公義因為你按呢審判； |
| 16:6 | 因為𪜶曾流聖徒及先知的血，
今你用血互𪜶飲； 是𪜶所應該的。 |
| 16:7 | 我閣聽見祭壇啲講：
主上帝──全能者啊，是啊， 你的審判是真實閣公義！ |
| 16:8 | 第四個將伊的碗傾佇日頭，就互日頭會用火煏人。 |
| 16:9 | 人受大的炎熱所煏，就謗瀆彼個有權啲掌理諸個災禍的上帝的名，閣無反悔來歸榮光伊。 |
| 16:10 | 第五個將伊的碗傾佇獸的座位，獸的國隨時黑暗。人因為艱苦就咬𪜶的舌； |
| 16:11 | 閣因為𪜶的艱苦，及𪜶的瘡毒，就謗瀆天裡的上帝，也無反悔𪜶的所行。 |
| 16:12 | 第六個將伊的碗傾佇伯拉大河，伊的水連鞭乾去，欲為著東方的列王來備辦路。 |
| 16:13 | 我閣看見有三個污穢的神，親像田蛤仔，對龍的嘴、及獸的嘴，及假先知的嘴出來。 |
| 16:14 | 𪜶就是諸個鬼的神，會行神蹟的，出來就近普天下的王，招集𪜶佇全能上帝的大日期的交戰。（ |
| 16:15 | 你看，我來親像賊。警醒來顧守伊的衫、免得褪裼來行、互人看見伊的見誚的就有福氣！） |
| 16:16 | 彼三個就招集列王佇一個所在，希伯來的音叫做亞瑪玉頓。 |
| 16:17 | 第七個將伊的碗傾佇空氣，就有大聲對殿內對座位出，講：「成啦！」 |
| 16:18 | 就有閃爁、有聲、有雷鳴，地亦大振動，對地上有人到今、未有地動親像按呢的大。 |
| 16:19 | 大城就裂做三個，列邦諸個城亦倒壞；上帝亦記得大城巴比倫，就將杯貯伊極大受氣的酒互伊。 |
| 16:20 | 逐個海嶼攏逃走，諸個山攏無去。 |
| 16:21 | 閣有大雹對天降落佇人，逐粒重幾若十斤。人因為雹的災禍，就謗瀆上帝，因為彼個災禍真大。 |