| 章節 | 台語漢字本聖經 請按此下載安裝Open Han 2024版字型，免得漏掉造字 |
| 6:1 | 掀開封密的印 羊羔開七個印的一個，彼時我啲看，就聽見四個活物的一個，伊的聲親像雷，講：「來啊！」 |
| 6:2 | 我就看，有白馬；騎伊的，有攑弓，亦有冕旒互伊。伊就出去，得勝閣欲得勝。 |
| 6:3 | 開第二個印的時，我聽見第二個活物講：「來啊！」 |
| 6:4 | 閣有一隻馬出來，是赤的，有權柄互彼個騎馬的，對地上搶奪和平，互人相刣；閣有將大支刀互伊。 |
| 6:5 | 開第三個印的時，我聽見第三個活物講：「來啊！」我就看，有黑馬；騎伊的，手攑秤。 |
| 6:6 | 我聽見四個活物的中間親像有聲講：「麥一升一個銀仔，大麥三升也一個銀仔；油及酒通拍歹。」 |
| 6:7 | 開第四個印的時，我聽見第四個活物的聲講：「來啊！」 |
| 6:8 | 我就看，有火灰色的馬；騎伊的，伊的名叫做死，陰府隨伊的後面同行；有權柄互𪜶，通治理地上的四份一，用刀劍、飢荒、瘟疫，及地上的野獸，來滅伊。 |
| 6:9 | 開第五個印的時，我看見祭壇下，有為著上帝的道理，及為著𪜶所執守的干證，來受刣的人的靈魂， |
| 6:10 | 大聲喉叫講：「聖閣真的主宰啊，你無審判𫢶佇地上的人，來伸阮流血的冤，欲到甚麼時啊？」 |
| 6:11 | 就有白衫互𪜶逐人；閣給𪜶講，著請歇淡薄久，聽候同做奴僕的及兄弟，就是欲親像𪜶受刣的，數額一盡滿。 |
| 6:12 | 我看伊開第六個印的時，地大振動，日變黑親像毛黑布，月歸個親像血， |
| 6:13 | 天星墜落地，親像無花果樹互大風所搖，落未熟的果子一樣。 |
| 6:14 | 天就抵著遷徙，親像軸捲起來；山及海嶼攏走差。 |
| 6:15 | 地上諸個王、大夫、千總、富人、猛人，以及攏總做奴僕的、自由的，家己匿佇山洞、山巖， |
| 6:16 | 對山及巖講：「壓佇阮的頂面！遮蓋阮，通閃避彼個坐佇座位者的面及羊羔的受氣； |
| 6:17 | 因為𪜶受氣的大日已經到啦，是誰徛會住啊？」 |