| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 主閣來的應允 所疼的兄弟啊，我現在所寫互恁的是第二張的批。佇此二張是欲互恁紀念，來點醒恁純全的心， |
| 3:2 | 互恁記得聖的先知讖語的話以及救主對恁的使徒所命令的。 |
| 3:3 | 第一，著知的，佇許個路尾的時日欲有戲謔的人出來，照家己的私慾來行的戲謔講： |
| 3:4 | 「伊應允閣來今佇叨落？因為對列祖睏去以來，萬項物對起頭創造照舊無各樣。」 |
| 3:5 | 因為𪜶許個人故意𣍐記得的，就是對早，有諸個天，閣有地對水出，對水來成，攏是對上帝的道。 |
| 3:6 | 對諸個天地當彼時的世間互水氾濫來滅無。 |
| 3:7 | 獨獨現今諸個天及地是對此個道囥啲，來聽候火，留啲到無敬虔的人受審判及滅無的日。 |
| 3:8 | 所疼的兄弟啊，有一項恁通𣍐記得，就是主看一日親像一千年，一千年親像一日。 |
| 3:9 | 主無延迁佇所應允，親像人有的看做延迁的，就是寬容恁，愛有人沈淪，是愛人攏反悔。 |
| 3:10 | 若是主的日欲到親像賊。彼日，許個天欲有大聲廢去，許個原質受燒來消滅，地及其中所有的物也燒燎去。 |
| 3:11 | 萬物既然欲按呢消滅，就恁佇聖及敬虔，著做甚麼號的人， |
| 3:12 | 來向望續催迫上帝的日到。為著按呢，諸個天會互火消滅，原質受燒就鎔去。 |
| 3:13 | 若是照伊所應允，咱向望新的天新的地，義𫢶佇𪜶中間。 |
| 3:14 | 所以，所疼的兄弟啊，恁既然向望諸個，著殷勤互恁無垃墋，無瑕疵，安然見著伊； |
| 3:15 | 閣著看咱的主的寬容做拯救的因由，親像阮所疼的兄弟保羅，照所賞賜伊的智慧也曾寫批互恁。 |
| 3:16 | 佇伊攏總的批啲論諸個事也是按呢講。其中有得明的，知影、無堅固的人解互伊斜去，親像解斜其餘的聖經，致到家己沈淪。 |
| 3:17 | 所疼的兄弟啊，按呢恁既然代先知，著持防免致互誣理的人差謬所引誘，來失落家己的堅固。 |
| 3:18 | 獨獨著進步佇咱的救主──耶穌基督的恩典以及識伊。願榮光歸伊，對現今到永遠的日。阿們！ |