| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 婦仁人及丈夫 恁做婦仁人的，也著按呢順服家己的丈夫；設使有的無趁道理，雖然無用講話，也通用婦仁人的所行得著𪜶來趁； |
| 3:2 | 因為看見恁清潔驚畏的所行。 |
| 3:3 | 恁的妝飾通用外面的辮頭毛，及掛金器，抑是穿衣服做妝飾， |
| 3:4 | 就是用心內隱密的人，穿溫柔、恬靜的心神做𣍐敗壞的衣服；這佇上帝的面前是真寶貝。 |
| 3:5 | 因為在早聖的婦仁人就是向望上帝的也是按呢家己妝飾，順服家己的丈夫， |
| 3:6 | 親像撒拉順趁亞伯拉罕，稱伊做主。恁若行好，無搭嚇來驚惶，就做伊的查某子。 |
| 3:7 | 恁做丈夫的，也著按呢照智識及婦仁人相及𫢶，尊敬伊是卡軟茈的器具，也是相及承接活命的恩。互恁的祈禱無抵著阻擋。 |
| 3:8 | 為義受苦 到底大家著同心，相體貼，相疼親像兄弟，憐憫謙卑。 |
| 3:9 | 無用歹報歹，抑是詈罵報詈罵，反轉著祝福；因為恁受召，是欲互恁承接祝福。 |
| 3:10 | 因為：
人若愛欲惜活命， 閣見著福氣的日， 就著禁止嘴舌無歹， 嘴唇無講詭譎； |
| 3:11 | 著離開歹來行好，
尋和平，來追趇伊。 |
| 3:12 | 因為，主的目睭看義人，
伊的耳孔聽𪜶的祈禱。 若是主的面鑑察行歹的人。 |
| 3:13 | 恁若為著好來熱心，是誰會害恁？ |
| 3:14 | 總是恁若因為義來受苦，就有福氣。莫得驚𪜶的威風，也莫得迫腹； |
| 3:15 | 獨獨恁心內著掠基督做主尊伊做聖。見若有人問恁所向望的因由，就著不時便便，用溫柔及驚畏來分訴； |
| 3:16 | 著存無通責備的良心，才恁佇叨落一項事受誹謗，就佇彼項事會互許個誣賴恁𫢶佇基督的好品行的，家己受見誚。 |
| 3:17 | 因為上帝的旨意若愛按呢，就恁行好來受苦，比行歹來受苦卡好。 |
| 3:18 | 因為基督也一擺為著罪受苦，義的替不義的，是欲導咱到佇上帝。論肉體，就受死；論神，就得活。 |
| 3:19 | 佇彼個神也曾去傳道理互監內許個神， |
| 3:20 | 就是早信趁的，當上帝吞愞聽候佇挪亞的日、啲備辦大船的時。入彼內面的人少少，只有八個對水得救。 |
| 3:21 | 此個所關照的洗禮，今也救恁；是除去肉體的垃墋，就是無通責備的良心向上帝來求，是對耶穌基督的復活。 |
| 3:22 | 伊已經去天裡，今佇上帝大旁；諸個天使及有權柄的，有氣力的，降服伊。 |