| 章節 | 台語漢字本聖經 請按此下載安裝Open Han 2024版字型，免得漏掉造字 |
| 2:1 | 即呢大的拯救 所以咱著益發致意所聽見的，驚了咱會致到溜去。 |
| 2:2 | 因為對天使所傳的道理尚且是堅固；也見若干犯違逆的代誌攏抵著應該受的報應。 |
| 2:3 | 咱若忽略即呢大的拯救，豈會逃閃嗎？此個拯救既然是主起頭講的，聽見的人干證到實實互咱。 |
| 2:4 | 閣上帝用諸個神蹟、奇事、逐項的權能，及聖神的賞賜，攏照家己的旨意，及𪜶相及干證。 |
| 2:5 | 拯救的首領 因為阮所講啲來的世界，上帝未曾互伊降服佇天使。 |
| 2:6 | 獨獨有干證佇某所在的講：
人是甚麼，互你數念伊？ 人的子是甚麼，互你看顧伊？ |
| 2:7 | 你互伊略仔卡輸天使，
閣用榮光尊貴，互伊做冕旒， 閣設立伊佇你的手所造者的頂面， |
| 2:8 | 互萬物攏降服佇伊的腳下。 已經互萬物攏降服伊，就無剩一項物無降服伊。總是到今咱猶未看見萬物攏降服伊。 |
| 2:9 | 獨獨看見彼個略仔卡輸天使的耶穌；為著受死的艱苦，得著榮光尊貴做冕旒，通對上帝的恩，為著眾人受死。 |
| 2:10 | 因為萬物所為著伊、萬物所對伊的，啲導多多子到佇榮光，就互救𪜶的首領，對苦難來成完全，本是合宜。 |
| 2:11 | 因為彼個互人成聖的及許個得著成聖的，攏對一個出。所以伊稱𪜶做兄弟無掠做見誚， |
| 2:12 | 講：
我欲報揚你的名佇我的兄弟， 謳咾你佇會中； |
| 2:13 | 閣講：
我欲倚靠伊； 閣講： 看啊，我及上帝所互我的子兒。 |
| 2:14 | 今諸個子兒既然相同有血肉的體，伊本身亦平平有，欲用死來廢無有死的權勢的，就是魔鬼， |
| 2:15 | 亦欲互一生驚畏死到親像做奴才者，攏得著解放。 |
| 2:16 | 因為伊無牽救天使，是牽救亞伯拉罕的後裔。 |
| 2:17 | 所以，凡事伊著及兄弟相同，通佇上帝的事做憐憫忠信的祭司頭，因為百姓的罪獻挽回的祭。 |
| 2:18 | 因為伊已經受苦來抵著試，就會幫助諸個受試的人。 |