| 章節 | 台語漢字本聖經 請按此下載安裝Open Han 2024版字型，免得漏掉造字 |
| 2:1 | 不法的人 兄弟啊，論到咱的主耶穌基督的臨到，及咱諸個聚集歸伊，阮求恁：無論對神、抑是對話，抑是對批假冒阮的名的，講主的日現在到啦， |
| 2:2 | 恁的心志莫得快快搖動，也莫得驚惶。 |
| 2:3 | 無論用甚麼法，一概莫得互人引誘；因為彼日猶未到，的確代先有背教的事，及彼個罪惡的人，就是沈淪的人，出現。 |
| 2:4 | 伊是做對敵，也自高，𨃟過一切稱做上帝及受敬拜的，甚至坐佇上帝的殿，表明做上帝。 |
| 2:5 | 我猶及恁佇啲的時，曾將諸個事給恁講，恁豈𣍐記得嗎？ |
| 2:6 | 今彼個阻擋伊，互伊到伊的期才出現的，恁也知。 |
| 2:7 | 因為不法的秘密已經啲運動，獨獨現今有一個阻擋伊的，直到彼個阻擋的對中央除去， |
| 2:8 | 彼時彼個不法的欲出現。主耶穌欲用伊的口氣來滅伊，用伊臨到的顯現來廢無伊。 |
| 2:9 | 彼個不法的臨到，是照撒但的運行，用一切的權能、神蹟，及假的兆頭， |
| 2:10 | 閣用一切不義的詭譎行佇許個啲沈淪的；因為𪜶無接納真理的疼，來得救。 |
| 2:11 | 為著按呢，上帝將差謬的運行降互𪜶，互𪜶信白賊， |
| 2:12 | 互見若信真理、去歡喜不義者攏受擬斷。 |
| 2:13 | 受揀選接受救恩 若是主所疼的兄弟啊，阮應該替恁常常感謝上帝；因為上帝對起頭揀恁，欲互恁得救，是在佇神的成聖，及信真理。 |
| 2:14 | 為著此個，伊對阮所傳的福音曾召恁，來得著咱的主耶穌基督的榮光。 |
| 2:15 | 所以，兄弟啊，著徛在，恁所得著的傳授，無論是對嘴講的，抑是對阮的批，凡所學習的，著執守伊。 |
| 2:16 | 咱的主耶穌基督及咱的父上帝，就是疼咱、也佇恩典將永遠的安慰及好的向望賞賜咱者， |
| 2:17 | 願伊安慰恁的心，堅固恁佇一切好的所行好的所講。 |