| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 請安 對上帝的旨意，做基督耶穌的使徒保羅及兄弟提摩太， |
| 1:2 | 批寄互歌羅西𫢶佇基督的聖徒，忠信的兄弟。願恁對咱的父上帝得著恩典、平安！ |
| 1:3 | 為信徒感謝上帝 阮常常替恁祈禱，感謝上帝就是咱的主耶穌基督的父； |
| 1:4 | 因為曾聽見恁佇基督耶穌的信，及向攏總的聖徒所有的疼， |
| 1:5 | 因為所給恁囥佇天裡的向望；就是恁前佇福音真理的道所聽見的。 |
| 1:6 | 此個福音已經到佇恁，親像佇遍世間啲結果子，也愈大欉，親像佇恁中間一樣，對恁曾聽見也真實知上帝的恩典彼日。 |
| 1:7 | 親像恁對以巴弗所學習的，伊是阮所疼、同做奴僕的。也為著阮做基督忠信的差用， |
| 1:8 | 伊也曾將恁佇聖神的仁愛報阮知。 |
| 1:9 | 基督的位格及工作 所以，阮對聽見的日，替恁祈禱懇求無息，願恁佇神靈逐樣的智慧及靈通，得著知伊的旨意到滿滿； |
| 1:10 | 互恁所行合佇主，凡事互伊歡喜，佇逐項好事結果子，閣識上帝愈久愈進步； |
| 1:11 | 閣照伊榮光的氣力，用逐樣的權能互恁有權能，致到恁凡事歡喜吞愞寬容； |
| 1:12 | 閣感謝父，因為伊互咱堪得有份聖徒的業佇光明的所在。 |
| 1:13 | 伊已經救咱脫離黑暗的權勢，來搬徙咱入伊所疼的子的國； |
| 1:14 | 𫢶佇伊咱得著贖回，就是咱的罪赦免。 |
| 1:15 | 伊是𣍐得通看見的上帝的像，伊是頭一個生的，佇攏總受創造者的代先。 |
| 1:16 | 因為萬物佇伊來創造，佇天裡，及佇地裡的；有通看見，及無通看見的；或是座位的，或是治理的，或是辦政事的，或是掌權的；萬項有攏是對伊，也為著伊才受創造。 |
| 1:17 | 伊佇萬項有的代先；萬項有𫢶佇伊來相及徛在。 |
| 1:18 | 伊是身軀的頭，身軀就是教會。伊是源起頭，對死人中起來的頭一個生的，互伊佇萬項有中做第一。 |
| 1:19 | 因為父歡喜互一切的豐盛𫢶佇伊。 |
| 1:20 | 已經將伊十字架的血來成就和平，就對伊互萬項有及伊本身閣再和──或是地上的、或是佇天裡的──攏是對伊。 |
| 1:21 | 閣恁平素佇歹的所行及上帝隔斷，心內做對敵。 |
| 1:22 | 今伊佇伊肉體的身軀對伊的死，已經互恁閣再和，欲互恁諸個成聖，無瑕疵、無通嫌的，徛佇伊的面前。 |
| 1:23 | 若恁長長𫢶佇信，有地基閣堅固，無受搖動，來離開福音的向望。這福音就是恁所曾聽見的，閣是傳佇天下攏總受創造者的中間，我保羅已經設立做伊的差用。 |
| 1:24 | 保羅為教會的工作 今我為著恁受諸個艱苦，是歡喜；我為著基督的身軀，就是教會，佇我的肉體補滿伊所未有盡的患難。 |
| 1:25 | 我設立做此個教會的差用，照上帝為著恁所交付我的職份，來圓滿上帝的道理， |
| 1:26 | 就是萬世萬代以來所囥密的奧妙；今已經顯明佇伊的聖徒。 |
| 1:27 | 上帝愛欲互𪜶知此個奧妙的榮光佇外邦中有偌富有，就是基督𫢶佇恁，做榮光的向望的； |
| 1:28 | 阮傳伊，用逐樣的智慧苦勸逐人，教示逐人，欲獻逐人𫢶佇基督來完全。 |
| 1:29 | 為著此個我著磨，照伊出力行佇我內面的功用來爭戰。 |