| 章節 | 台語漢字本聖經 請按此下載安裝Open Han 2024版字型，免得漏掉造字 |
| 2:1 | 用基督的心做心 所以，若佇基督有甚麼勸勉，抑是甚麼仁愛的安慰，抑是有聖神的甚麼交通，抑是有甚麼慈悲憐憫， |
| 2:2 | 恁著互我的歡喜充滿，就是同心志，同仁愛，心神和合，心志專一。 |
| 2:3 | 凡事莫得為著結黨，抑是為著空空的榮光來做；獨獨大家用謙遜的心，看別人卡贏佇本身。 |
| 2:4 | 恁逐人莫得顧家己的事，也著顧別人的事。
|
| 2:5 | 恁著有基督耶穌的心做心：
|
| 2:6 | 伊本有上帝的形狀，
無掠及上帝平等做所著執守的； |
| 2:7 | 反轉傾空家己，
取奴僕的形狀， 成做人的樣相； |
| 2:8 | 已經有親像人的款式，就屈家己，
順服到佇死， 甚至死佇十字架。 |
| 2:9 | 所以，上帝高升伊極高，
賞賜伊彼個名𨃟過佇萬名的頂面的， |
| 2:10 | 互見若佇天、佇地，及佇地下的，
佇耶穌的名無一個腳頭窩跪拜， |
| 2:11 | 無一個嘴稱呼「耶穌基督做主」，
來歸榮光父上帝。 |
| 2:12 | 佇世上親像照光佇世間的 所以，我所疼的兄弟啊，親像恁曾常常順趁，若佇我及恁佇啲的時，就現今我無及恁佇啲，益發著用驚惶愕愕惙來做成恁家己的得救。 |
| 2:13 | 因為恁有彼個意願，有彼個所行，攏是對上帝為著伊的好意來行佇恁心內。 |
| 2:14 | 恁凡事莫得耦耦唸，莫得爭辯， |
| 2:15 | 才互恁無通嫌，真實無假，做上帝的子兒無瑕疵佇邪僻橫逆的世界。恁佇𪜶中間出現，親像照光佇世間的， |
| 2:16 | 顯明活命的道理，互我到佇基督的日有通誇口，因為我是空空跑走，也是空空著磨。 |
| 2:17 | 就若用恁的信做祭物來服事，我做灌奠佇彼頂面，我是歡喜，也及恁眾人相及歡喜。 |
| 2:18 | 恁也著按呢歡喜，續及我相及歡喜。 |
| 2:19 | 提摩太及以巴弗提 若是我𫢶佇主耶穌向望緊緊差提摩太去就近恁，互我知恁的事，來安我的心。 |
| 2:20 | 因為我無別個同心的人，真正掛慮恁的代誌的。 |
| 2:21 | 因為眾人攏是圖謀家己的事，是圖謀耶穌基督的事。 |
| 2:22 | 若是提摩太的經驗恁知；就是及我相及著磨，來興起福音，親像子對老父按呢。 |
| 2:23 | 所以，我看我的代誌怎樣，向望連鞭差伊去； |
| 2:24 | 總是我𫢶佇主深信本身也欲緊緊到。 |
| 2:25 | 若是我想要緊著差以巴弗提就近恁。伊就是我的兄弟，同做工的，同當兵的，也是恁的使者，供給我所欠用的。 |
| 2:26 | 因為伊戀慕恁眾人，來慘慼，是恁曾聽見伊破病。 |
| 2:27 | 伊果然有破病，到險險死；若是上帝憐憫伊，若憐憫伊，也憐憫我，免得我佇憂悶中加添憂悶。 |
| 2:28 | 所以我閣卡致意差伊，互恁閣看見伊，來歡喜，我就卡無憂悶。 |
| 2:29 | 所以，恁𫢶佇主著歡歡喜喜接納伊，也著尊重親像此號的人； |
| 2:30 | 因為伊為著做基督的工，險險死，家己拼命，欲補恁服事我所無夠的。 |