| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 請安 對上帝的旨意，做基督耶穌的使徒保羅，批寄互𫢶以弗所諸個聖徒，忠信佇基督耶穌的。 |
| 1:2 | 願恁對咱的父上帝及主耶穌基督得著恩典、平安！ |
| 1:3 | 基督裡屬神的福氣 願咱的主耶穌基督的上帝也是伊的父得著謳咾！伊佇基督曾賞賜咱佇天裡逐項屬佇神的福氣： |
| 1:4 | 就是照伊創造世間的代先，佇基督揀咱，互咱佇伊的面前成做聖，無通嫌； |
| 1:5 | 伊照伊的旨意所歡喜的，用仁愛代先定著咱對耶穌基督得著做子來歸佇伊， |
| 1:6 | 互伊恩典的榮光得著謳咾；此個恩典就是伊佇所疼的子賞賜咱的。 |
| 1:7 | 𫢶佇伊咱對伊的血得著贖回，赦免罪過，照伊恩典的富有。 |
| 1:8 | 伊將此個恩典用逐樣的智慧及見識，賞賜咱到滿滿； |
| 1:9 | 已經互咱知伊旨意的奧妙，照伊的好意， |
| 1:10 | 就是伊佇本身所代先定著的，欲佇諸個日期圓滿的時，設法互萬物不論佇天裡的、佇地裡的，攏佇基督來合一。 |
| 1:11 | 𫢶佇伊咱也成做家業；就是代先受定著的，照彼個趁家己的旨意、行萬項有者的意思， |
| 1:12 | 欲互伊的榮光對阮代先向望佇基督的人得著謳咾。 |
| 1:13 | 𫢶佇伊恁也已經聽見真理的道，救恁的福音，既然信，就𫢶佇伊有受所應允的聖神蓋印。 |
| 1:14 | 伊就是做咱承接業的準當，到上帝所得著的業贖回，互伊的榮光得著謳咾。 |
| 1:15 | 保羅的祈禱 因為按呢，我既然聽見恁中間佇主耶穌的信，及顯出佇眾聖徒的仁愛， |
| 1:16 | 就為著恁感謝無息。祈禱的時數念恁， |
| 1:17 | 求咱的主耶穌基督的上帝，榮光的父，賞賜恁智慧啟示的神，來深識上帝， |
| 1:18 | 恁的心目得著光明，互恁知伊召人所向望的是怎樣，伊的業佇聖徒中榮光的富有到怎樣； |
| 1:19 | 閣知伊的權能向佇咱諸個信的人大到怎樣， |
| 1:20 | 照伊前所曾行佇基督大權能大氣力的功用，互伊對死人中復活，佇天裡坐伊的大旁， |
| 1:21 | 𨃟過攏總辦政事的、掌權的、才能的、治理的，及一切所號的名；若佇今世也佇來世，攏𨃟過遠遠。 |
| 1:22 | 閣互萬項有降服佇伊的腳下，閣將伊做管萬有的頭來賞賜教會。 |
| 1:23 | 教會是伊的身軀，伊所充滿的，伊也是用萬有充滿萬有的。 |