| 章節 | 台語漢字本聖經 請按此下載安裝Open Han 2024版字型，免得漏掉造字 |
| 9:1 | 使徒的權利 我豈𣍐得自由嗎？豈是使徒嗎？豈曾看見咱的主耶穌嗎？恁豈是我𫢶佇主做成的工嗎？ |
| 9:2 | 設使對佇別人，我是使徒，對佇恁我無是，因為恁𫢶佇主就是我做使徒的印證。 |
| 9:3 | 有查問我的，我就用此個家己分訴： |
| 9:4 | 阮豈無權通飲通食嗎？ |
| 9:5 | 阮豈無權通娶信主的姊妹做某，來及阮相及行，親像其餘的使徒及主的兄弟及磯法嗎？ |
| 9:6 | 抑是干單我及巴拿巴無權通免做工嗎？ |
| 9:7 | 甚麼人當兵來食家己的糧嗎？甚麼人栽葡萄園無食伊的果子嗎？甚麼人飼精牲，無食彼陣的奶嗎？ |
| 9:8 | 我講諸個，豈是照人的意見嗎？抑是律法無按呢講嗎？ |
| 9:9 | 因為佇摩西的律法有記載講：「磨五穀的牛，莫得籠伊的嘴」。上帝豈是致意佇牛嗎？ |
| 9:10 | 抑是一概為著咱來講伊？真正是為著咱來寫。因為犂園的著存向望來犂；磨五穀的著向望相及有份來磨。 |
| 9:11 | 阮若將屬佇神的物撒佇恁中間，就對恁收成屬佇肉體的物，豈是過頭嗎？ |
| 9:12 | 別人對佇恁尚且有份此個權柄，何況阮嗎？ 總是阮曾用此個權，反轉吞愞逐項的事，免得阮有甚麼阻擋基督的福音。 |
| 9:13 | 豈知著磨佇聖的事的食殿內的物？跟隨祭壇的及祭壇相及分物嗎？ |
| 9:14 | 親像按呢，主設法互傳福音的人著對福音來度活。 |
| 9:15 | 若是諸個事我攏未曾用。閣我寫諸個，是愛人按呢款待我，因為我寧可死不致人互我所誇口的歸佇空空。 |
| 9:16 | 我傳福音是通誇口的事，是不得已若定。因為若無傳福音，我就有災禍。 |
| 9:17 | 我若甘心做此個事，就有報賞；就若甘心，有職任已經交代我啦。 |
| 9:18 | 按呢，我的報賞是甚麼啊？就是我啲傳福音互人免所費也會得著福音，免得我佇福音所有的權用到盡。 |
| 9:19 | 我對佇眾人雖罔是自由，猶久將家己做眾人的奴僕，為著欲得著人愈多。 |
| 9:20 | 向猶太人，我就親像猶太人，欲得著猶太人；向法下的人，我雖然本身無屬佇法下，就親像法下的人，欲得著法下的人。 |
| 9:21 | 向法外的人，我就親像法外人，欲得著法外的人；其實我是佇上帝的法外，就是佇基督的法內。 |
| 9:22 | 向軟弱的人，我就成做軟弱，欲得著軟弱的人。向逐號人，我成做逐號款，一概是欲救人。 |
| 9:23 | 逐項事，我因為福音來行，是互我通相及有份佇福音。 |
| 9:24 | 豈知在場走的逐個攏走，若是得著報賞的只有一個？恁著按呢走，才通得著。 |
| 9:25 | 見若力的，逐項事撙節，𪜶是欲得著會敗壞的冕旒；若是咱是欲得著𣍐敗壞的。 |
| 9:26 | 所以，我按呢啲走是親像無定著的方向；我拍拳無親像啲拍空氣。 |
| 9:27 | 我拍我的身軀到殄殄，互伊降服，驚了我已經傳互別人，本身豈採抵著拒絕。 |