| 章節 | 台語漢字本聖經 請按此下載安裝Open Han 2024版字型，免得漏掉造字 |
| 16:1 | 個人請安 我對恁舉薦咱的姊妹非比，就是堅革哩教會的差用。 |
| 16:2 | 互恁為著主接待伊，照聖徒所合宜。伊有欠用恁幫助的，就幫助伊，因為伊曾扶助多多人，也曾扶助我。 |
| 16:3 | 請安百基拉、亞居拉。佇基督耶穌及我同著磨者， |
| 16:4 | 也為著我的生命曾拋死。若我感謝𪜶，就外邦的眾教會也是按呢。 |
| 16:5 | 閣請安聚集佇伊的家的教會。請安我所疼的以拜尼土；伊是亞西亞頭一個屬基督的。 |
| 16:6 | 請安馬利亞；伊曾為著恁多多著磨。 |
| 16:7 | 請安我的親戚安多尼古、猶尼亞；𪜶曾及我同關監；有名聲佇使徒中，閣代先我𫢶佇基督。 |
| 16:8 | 請安暗伯利𫢶佇主互我所疼的。 |
| 16:9 | 請安佇基督及我同著磨的耳巴奴，以及我所疼的士大古。 |
| 16:10 | 請安亞比利佇基督有經驗的。請安亞利多布家內的人。 |
| 16:11 | 請安我的親戚希羅天。請安拿其數家內𫢶佇主的人。 |
| 16:12 | 請安佇主啲著磨的土非拿、土富撒。請安所疼的彼息，曾佇主多多著磨的。 |
| 16:13 | 請安佇主得著揀選的魯孚及伊的老母；也是我的老母。 |
| 16:14 | 請安亞遜其土、弗勒干、黑米、八羅巴、黑馬，以及及𪜶佇啲的兄弟。 |
| 16:15 | 請安非羅羅古及猶利亞，尼利亞及伊的姊妹，及阿林巴以及及𪜶佇啲的眾聖徒。 |
| 16:16 | 恁著用聖的相唚，大家相請安。基督的眾教會請安恁。 |
| 16:17 | 兄弟啊，我勸恁著省察許個分黨塞礙的，就是背恁所學習的教示的，閣著閃避𪜶。 |
| 16:18 | 因為此號人無服事咱的主基督，是服事家己的腹肚，用𪜶的奇巧諂媚的話迷惑正直的人的心。 |
| 16:19 | 因為恁的順服已經遍傳佇眾人，所以我為著恁歡喜；獨獨論到好事，我愛恁有智識，論到歹事，就愛恁清白。 |
| 16:20 | 賞賜平安的上帝欲緊緊踏碎撒但佇恁的腳下。願咱的主耶穌基督的恩及恁佇啲。 |
| 16:21 | 及我同著磨的提摩太，以及我的親戚路求、耶孫、所西巴德，請安恁。 |
| 16:22 | 我德丟就是寫此張批的，佇主請安恁。 |
| 16:23 | 我及全教會永歇伊兜的該猶請安恁。 |
| 16:24 | 城內管庫房的以拉都及兄弟括土請安恁。 |
| 16:25 | 頌讚 上帝會堅固恁照我的福音及所宣傳耶穌基督的事，也照永世代所隱密奧妙的闡明。 |
| 16:26 | 此個奧妙此霎有著現，也對先知的冊，照永遠上帝的命令來指示萬邦，互𪜶對信來順趁。 |
| 16:27 | 願榮光對耶穌基督歸佇獨一有智慧的上帝，代代無息。阿們！ |