| 章節 | 台語漢字本聖經 請按此下載安裝Open Han 2024版字型，免得漏掉造字 |
| 15:1 | 通求家己的歡喜，著互厝邊歡喜 咱諸個會的人應該著擔代𣍐的人的軟弱，通求家己的歡喜。 |
| 15:2 | 咱逐人著互厝邊歡喜，互𪜶得著好來建立。 |
| 15:3 | 因為基督也無求家己的歡喜，就是照所記載講：「人詈罵你的詈罵有到佇我。」 |
| 15:4 | 因為早所記載的攏是欲教示咱才來記，互咱對吞愞，對聖經的安慰來得著向望。 |
| 15:5 | 願賞賜吞愞安慰的上帝互恁大家同心志，照基督耶穌， |
| 15:6 | 互恁一樣心一樣嘴榮光上帝──就是咱的主耶穌基督的父。 |
| 15:7 | 上帝的福音無界限 所以，著相接納，親像基督也有接納恁，致到榮光歸佇上帝。 |
| 15:8 | 因為我講，基督為著上帝的真實曾做奉割禮的人的差用，欲堅固所應允列祖的， |
| 15:9 | 也互外邦人為著憐憫歸榮光上帝。照所記載講：
因為按呢我佇外邦中欲稱呼你， 唱歌謳咾你的名； |
| 15:10 | 閣講：
恁外邦人著及伊的百姓同歡喜。 |
| 15:11 | 又閣講：
恁眾外邦著稱讚主！ 恁萬百姓著謳咾伊！ |
| 15:12 | 又閣以賽亞講：
欲有耶西的根頭， 及興起來治理外邦的； 外邦欲倚靠伊來有向望。 |
| 15:13 | 願賞賜向望的上帝，互恁對信來充滿逐樣的歡喜、平安，互恁佇聖神的權能得著滿滿的向望。 |
| 15:14 | 保羅的宣教使命 我的兄弟啊，我家己也深信恁滿滿善良，充足逐樣的智識，也會大家相勸勉。 |
| 15:15 | 總是我寫批互恁有淡薄卡好膽，欲互恁閣會記得，這是對上帝所互我的恩典， |
| 15:16 | 互我佇外邦做基督耶穌的執事，用上帝的福音來服事，欲互所獻的外邦人，佇聖神成聖的得著接納。 |
| 15:17 | 所以論上帝的事，我佇基督耶穌有通誇口。 |
| 15:18 | 因為除基督用我所行的以外，我敢講甚麼，只有講伊用我的言語及行做，佇神蹟及奇事的權能，及佇聖神的權能，互外邦順服； |
| 15:19 | 按呢我對耶路撒冷踅到以利哩古，遍傳基督的福音。 |
| 15:20 | 閣我立志傳福音無佇基督已經受稱呼的所在，驚了起佇別人的地基頂。 |
| 15:21 | 就是照所記載講：
未得著伊的消息的，欲看見； 未聽見的，欲曉悟。 |
| 15:22 | 保羅計劃訪問羅馬 因為按呢我多多擺抵著阻擋，𣍐得通就近恁。 |
| 15:23 | 若是現今，佇諸個地方無閣有所在通去，已經多多年有欣慕欲就近恁，聽候我去士斑雅的時， |
| 15:24 | 因為我向望經過的時，見著恁，代先及恁交陪略略仔滿意，後來得著恁送行去遐。 |
| 15:25 | 總是現在，我去耶路撒冷供給聖徒。 |
| 15:26 | 因為馬其頓、亞該亞人歡喜相及兌捐幫助耶路撒冷聖徒中的喪鄉人。 |
| 15:27 | 𪜶真正是歡喜，卻也是欠𪜶的債；因為外邦人既然相及有份佇𪜶神靈的事，自然著用肉體的物服事𪜶。 |
| 15:28 | 聽候我做完此個事，將此個捐項交付𪜶明白，我欲對恁遐去士斑雅。 |
| 15:29 | 我也知就近恁的時，欲有基督豐盛的祝福順續去。 |
| 15:30 | 兄弟啊，我對咱的主耶穌基督，也對聖神的疼，勸恁及我同盡力，替我祈求上帝， |
| 15:31 | 救我脫離猶太地許個順服的人，也互我為著耶路撒冷所做供給的事得著聖徒接納， |
| 15:32 | 互我對上帝的旨意到恁遐，有歡喜也及恁相及得著安息。 |
| 15:33 | 願賞賜平安的上帝及恁眾人佇啲。阿們！ |