| 章節 | 台語漢字本聖經 請按此下載安裝Open Han 2024版字型，免得漏掉造字 |
| 20:1 | 保羅閣訪問馬其頓及希利尼 喊嘩已經定，保羅叫學生來，勸𪜶，就及𪜶離別，起身欲去馬其頓。 |
| 20:2 | 已經經過許個地方，用多多話苦勸𪜶，就到希利尼。 |
| 20:3 | 𫢶遐三月日，欲搭船去敘利亞，猶太人設計欲害伊，伊就定著意思對馬其頓倒轉。 |
| 20:4 | 隨伊去亞西亞的人，有庇哩亞人畢羅的子所巴特，帖撒羅尼迦人亞里達古及西公都，特庇人該猶及提摩太，閣有亞西亞人推基古及特羅非摩。 |
| 20:5 | 此幾人代先去，佇特羅亞聽候阮。 |
| 20:6 | 除酵節後，阮對腓立比開船，五日到特羅亞，及𪜶相會，𫢶遐七日。 |
| 20:7 | 保羅最後一擺訪問特羅亞 七日的頭一日，阮諸個聚集欲擘餅，保羅愛佇隔日起身，就及𪜶講論道理，延到半暝。 |
| 20:8 | 阮所聚集的樓，有點多多燈。 |
| 20:9 | 有一個少年人，名猶推古，坐佇窗仔頂，睏重眠。保羅講論已經久，少年人因為睏，對三層樓跋落來；人來扶伊，已經死啦。 |
| 20:10 | 保羅落去，仆佇伊的身上，抱伊，講：「恁莫作聲，伊的魂猶佇啲。」 |
| 20:11 | 就閣上去，擘餅來食，相及談論久久，到天光，就起身。 |
| 20:12 | 囝仔已經活，人導伊來，大受安慰。 |
| 20:13 | 對特羅亞到米利都 阮代先上船，開船去亞朔，愛佇遐至接保羅；因為伊有按呢吩咐，家己欲對路去。 |
| 20:14 | 已經佇亞朔及阮相會，阮就接伊上船，去米推利尼。 |
| 20:15 | 對遐開船，第二日到基阿的對面；隔日，船擱佇撒摩；閣一日，到米利都。 |
| 20:16 | 因為保羅決意搭船閃過以弗所，免得久久𫢶佇亞西亞，就趕緊行，看會通佇五旬節日到耶路撒冷。 |
| 20:17 | 保羅向以弗所長老論講 對米利都差人到以弗所，請教會的長老來。 |
| 20:18 | 𪜶已經到，就對𪜶講：「恁家己知，我對起頭踏著亞西亞地的日，頭到尾及恁怎樣， |
| 20:19 | 我服事主，凡事謙遜，閣流目屎，閣對猶太人的謀害，歷過試煉。 |
| 20:20 | 凡有利益的，我未曾勼狹無給恁講，來教示恁，無論佇眾人的面前，抑是佇諸個人家； |
| 20:21 | 對猶太及希利尼人證明著向上帝來反悔，閣著向咱的主耶穌基督來信。 |
| 20:22 | 今我的心神受縛去耶路撒冷，未知佇遐欲抵著怎樣； |
| 20:23 | 獨獨聖神佇逐個城對我證明，講有鎖鍊及患難啲聽候我， |
| 20:24 | 若是我無掠生命做要緊，來看做寶貝，獨獨是欲盡我的路站，及對主耶穌所受的職份，來證明上帝恩典的福音。 |
| 20:25 | 「我平素四界行，佇恁中間傳上帝的國；今我知，恁眾人無閣見我的面。 |
| 20:26 | 所以我今仔日對恁干證，若有人沈淪，我無責成。 |
| 20:27 | 因為我未曾勼狹，無用上帝的旨意一盡給恁講。 |
| 20:28 | 恁著家己謹慎，亦著謹慎全群，聖神佇𪜶中間設立恁做監督，來照顧上帝的教會，就是伊用家己的血所得著的。 |
| 20:29 | 我知，我離開了後欲有兇惡的豺狼入恁中間，無惜羊群。 |
| 20:30 | 閣對恁家己的中間，欲有人起來講逆理的話，愛引誘學生趁伊。 |
| 20:31 | 所以恁著警醒，記念我三年的久暝日無息、流目屎來警戒恁逐人。 |
| 20:32 | 今我將恁交託上帝及伊恩典的道；是會建立恁，互恁得著業佇攏總成聖的人的中間。 |
| 20:33 | 我未曾貪人的銀、金、衣服。 |
| 20:34 | 恁家己知，此二支手有供給我的欠用，以及及我佇啲的人。 |
| 20:35 | 我凡事做恁的模樣，著按呢著磨，來扶持軟弱的人，閣著記得主耶穌本身的話，講：『互人的比對人提的卡有福氣。』」 |
| 20:36 | 講息，跪落及𪜶眾人祈禱。 |
| 20:37 | 眾人大啼哭，抱保羅的頷頸，唚伊。 |
| 20:38 | 第一煩惱的，就是伊所講的話「以後𣍐閣見著伊的面」，就送伊落船。 |