| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 燒祭的條例 耶和華叫摩西對會幕內，給伊講： |
| 1:2 | 「你著吩咐以色列人給𪜶講：恁中間若有人獻禮物互耶和華，著對牛群羊群中獻精牲做禮物。 |
| 1:3 | 「伊的禮物若對牛群取做燒祭，就著獻一隻無瑕疵的牛牨，著佇會幕門口獻伊，通佇耶和華的面前得著接納。 |
| 1:4 | 伊著按手佇燒祭的精牲的頭殼頂，就為著伊受接納，替伊贖罪。 |
| 1:5 | 伊著佇耶和華的面前刣牛牨仔；亞倫的子孫做祭司者，著獻彼個血，將血灑佇會幕門口、壇的四周圍。 |
| 1:6 | 伊著剝燒祭的精牲的皮，切伊的肉一塊一塊。 |
| 1:7 | 祭司亞倫的子孫著用火下佇壇頂，用柴排佇火的頂面。 |
| 1:8 | 亞倫的子孫做祭司者，著將肉塊及頭及油排佇壇頂火裡的柴。 |
| 1:9 | 獨獨燒祭的臟腑及腿伊著用水洗伊。祭司就著將一切攏燒佇壇頂，做燒祭，獻互耶和華做芳芳的火祭。 |
| 1:10 | 「伊的禮物若對羊群中來做燒祭，或是綿羊或是山羊，著用無瑕疵的公的來獻。 |
| 1:11 | 著佇壇邊的北勢，刣伊佇耶和華的面前；亞倫的子孫做祭司者，著用伊的血灑佇壇的四周圍。 |
| 1:12 | 著給伊切一塊一塊，連頭及油，祭司著排佇壇頂火裡的柴； |
| 1:13 | 獨獨臟腑及腿著用水洗伊，祭司著將一切攏獻，燒佇壇頂。這是燒祭，獻互耶和華做芳芳的火祭。 |
| 1:14 | 「伊獻互耶和華的禮物，若用鳥隻做燒祭，就著獻鳩鵻抑是鴿仔子做禮物。 |
| 1:15 | 祭司著帶鳥仔到壇前，捘斷伊的頭，燒佇壇頂；伊的血著瀝佇壇邊； |
| 1:16 | 閣著將鳥的胿及伊的毛除去，㧒佇壇邊的東勢火灰的所在。 |
| 1:17 | 著搝鳥的二翅，將伊拆開，總是通破互伊斷；祭司著燒伊佇壇頂、火裡的柴。這是燒祭，獻互耶和華做芳芳的火祭。」 |