| 章節 | 台語漢字本聖經 請按此下載安裝Open Han 2024版字型，免得漏掉造字 |
| 13:1 | 「當彼日，欲為著大衛的家及耶路撒冷徛起的百姓開一個水泉，洗除罪惡及垃墋。」 |
| 13:2 | 萬軍的耶和華講：「當彼日，我欲對此個地方除去偶像的名，無閣互人紀念；也欲互先知及污穢的神離開此所在。 |
| 13:3 | 若有人讖語，生伊的父母欲給伊講：『你𣍐得著活，因為你託耶和華的名講白賊。』生伊的父母佇伊讖語的時，欲將伊鑿透。 |
| 13:4 | 彼日，許個先知逐個佇𪜶讖語的時欲為著𪜶的異象來見誚，無閣穿有毛的衫來騙人。 |
| 13:5 | 伊欲講：『我是先知，我是作穡人；我對細漢就做人的奴僕。』 |
| 13:6 | 有人欲問伊講：『你二手的中間是甚麼傷啊？』伊欲應講：『這是我佇朋友的家中所受的傷。』」 |
| 13:7 | 牧者受刣 萬軍的耶和華講： 刀劍啊，著起來， 攻擊我的牧者也攻擊彼個及我做同伴的人。 拍牧者，羊群就四散； 許個微細者，我欲越轉手到佇𪜶。 |
| 13:8 | 耶和華講：此個全地的人，
二份欲受剪除來死， 一份欲留啲。 |
| 13:9 | 我欲互此個三份一經過火，
鍛煉𪜶，親像鍛煉銀； 試煉𪜶，親像試煉金。 𪜶欲求叫我的名， 我欲應𪜶。 我欲講：這是我的百姓。 𪜶也欲講：耶和華是我的上帝。 |