| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 耶和華命令重起聖殿 大利烏王二年六月初一，耶和華的話託先知哈該傳互猶大的總督撒拉鐵的子所羅巴伯，及約撒答的子祭司頭約書亞講： |
| 1:2 | 萬軍的耶和華，伊的話按呢講：「此個百姓講起耶和華殿的時彼個時猶未到。」 |
| 1:3 | 彼時耶和華的話託先知哈該講： |
| 1:4 | 「此間殿猶原荒廢，這豈是恁家己徛起天花板的厝的時嗎？ |
| 1:5 | 今萬軍的耶和華按呢講：恁著省察恁的所行。 |
| 1:6 | 恁撒種子多，收成少；恁食，也𣍐飽；飲，也𣍐止渴；穿衫，也𣍐燒；得著工錢者，用工錢下佇破孔的袋仔。」 |
| 1:7 | 萬軍的耶和華按呢講：「恁著省察恁的所行。 |
| 1:8 | 恁著上山取柴料，來起此個殿，我就因為按呢歡喜，閣得著榮光。這是耶和華講的。 |
| 1:9 | 恁向望得著多，你看，反轉得著少；恁帶到厝的，我就歕互伊無去。這是甚麼緣故？是因為我的殿荒廢，恁逐人緊急家己的厝。這是萬軍的耶和華講的。 |
| 1:10 | 所以因為恁的緣故，天就無落露水，地也無出伊的土產。 |
| 1:11 | 我互亢旱到佇土地、佇山頭、佇五穀、佇新酒、佇油、佇地上所出的、佇人、佇精牲、佇人的手著磨得著的。」 |
| 1:12 | 百姓順趁上帝的命令 彼時，撒拉鐵的子所羅巴伯，及約撒答的子祭司頭約書亞，及所剩的百姓，攏聽趁𪜶的上帝──耶和華的聲，及先知哈該奉耶和華──𪜶的上帝差伊所講的話；百姓亦佇耶和華的面前存驚畏的心。 |
| 1:13 | 耶和華的使者哈該照耶和華所命令給百姓講：「耶和華講：我及恁佇啲。」 |
| 1:14 | 耶和華激動猶大的總督撒拉鐵的子所羅巴伯的心及約撒答的子祭司頭約書亞的心，及剩的百姓的心，𪜶就來佇萬軍的耶和華──𪜶的上帝的殿做工。 |
| 1:15 | 這是佇大利烏王二年六月二十四日。 |