| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 耶路撒冷的罪惡及救贖 此個悖逆污穢、暴虐的城有災禍啊！ |
| 3:2 | 伊無聽趁所對伊講的話，無受教示，
無倚靠耶和華， 無親近伊的上帝。 |
| 3:3 | 伊的貴族佇彼中間是噤噤哮的獅；
伊的審判官是下昏時的豺狼， 一點仔物也無留到過早起。 |
| 3:4 | 伊的先知是浮漂詭詐的人；
伊的祭司是褻瀆聖所， 改斜律法。 |
| 3:5 | 耶和華是公義者，𫢶佇𪜶中間，
無行不義， 逐早起顯出伊的公平，無隔斷； 獨獨不義的人知見誚。 |
| 3:6 | 我已經除滅列國；
𪜶的城樓毀壞。 我互𪜶的街路冷靜，致到無人經過； 𪜶的城毀滅，無人佇啲， 無人徛起。 |
| 3:7 | 我講：你獨獨著敬畏我，著受教示；
才互伊的厝無照我所辦理伊的來受除滅。 總是𪜶透早起來家己敗壞𪜶一切的所行。 |
| 3:8 | 耶和華講：所以恁著聽候我，
到我起來搶提的日； 因為我已經定著意思招集列國，會集列邦， 將我的受氣──就是我猛烈的受氣攏傾落佇𪜶。 全地欲互我大受氣的火燒滅。 |
| 3:9 | 彼時，我欲互萬百姓的言語變做清氣，
通求叫耶和華的名， 同心一意服事伊。 |
| 3:10 | 祈禱我者，就是我四散的百姓，
欲對古實河外來，獻禮物互我。 |
| 3:11 | 當彼日，你的確無因為你一切得罪我的事家己見誚；
因為佇彼時我欲對你中間除去誇口驕傲的人， 你就無閣佇我的聖山自高。 |
| 3:12 | 我亦欲留困苦喪鄉的百姓佇你的中間；
𪜶欲倚靠耶和華的名。 |
| 3:13 | 以色列所剩的百姓啲欲無行歹，
無講白賊，嘴內無詭詐的舌； 𪜶欲穩食穩睏，無人互𪜶驚。 |
| 3:14 | 歡樂的歌 錫安的百姓啊，應該著唱歌！ 以色列啊，著歡喜來叫！ 耶路撒冷的百姓啊，著滿心歡喜快樂！ |
| 3:15 | 耶和華已經除去你的罪案，
趕出你的對敵。 以色列的王──耶和華佇你中間， 你免閣驚災禍。 |
| 3:16 | 當彼日，欲給耶路撒冷講：
莫得驚！錫安啊！ 你的手通垂落去！ |
| 3:17 | 你的上帝──耶和華佇你的中間，
就是全能者、拯救者。 伊欲為著歡喜你來快樂， 伊欲因為疼你來靜靜， 閣為著歡喜你來唱歌。 |
| 3:18 | 因為欣慕節期來憂悶者，我欲聚集𪜶，
𪜶是屬你者、𪜶擔當凌辱親像擔重擔。 |
| 3:19 | 看啊，當彼時，我欲辦許個苦楚你者，
欲拯救跛腳者，欲聚集受趕逐者。 許個佇全地受凌辱者， 我欲互𪜶得著謳咾、名聲。 |
| 3:20 | 彼時，我欲互恁來，彼時我欲聚集恁；
因為我互恁受掠的人佇恁的目前倒轉來的時， 就欲互恁佇地上萬百姓的中間，得著名聲、謳咾。 這是耶和華講的。 |