| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 當猶大王亞們的子約西亞坐位的時，耶和華的話臨到希西家的元孫，亞瑪利雅的曾孫，基大利的孫，古示的子西番雅。 |
| 1:2 | 耶和華審判的日子 耶和華講： 我欲對地上一盡除滅萬物。 |
| 1:3 | 我欲除滅人及精牲，
除滅空中的鳥、海內的魚， 以及塞礙的石及歹人； 我欲將人對地上剪除。 這是耶和華講的。 |
| 1:4 | 我欲伸我的手攻擊猶大
及耶路撒冷一切徛起的百姓， 亦欲對此個所在剪除巴力所剩者， 以及基瑪林的名及祭司， |
| 1:5 | 見若佇厝頂拜天頂的萬象者，
及許個敬拜者，指耶和華來咒誓， 及指瑪勒堪來咒誓者， |
| 1:6 | 及許個悖逆耶和華者，
以及無尋耶和華亦無求伊者， 攏欲剪除伊。 |
| 1:7 | 你著佇主耶和華的面前靜靜，
因為耶和華的日近啦。 因為耶和華已經備辦一個祭祀， 將伊的人客分別做聖。 |
| 1:8 | 到耶和華祭祀的日，
我欲辦諸個貴族及王的子， 及攏總穿外邦人的衫者。 |
| 1:9 | 到彼日，我欲辦一切跳過戶椗、
將強暴及詭詐充滿主人的厝者。 |
| 1:10 | 耶和華講：當彼日，
佇魚門欲有悲哀的聲， 對第二個所在欲有喉叫， 對諸個山欲有大崩陷的聲。 |
| 1:11 | 徛起瑪革提施的百姓啊，恁著喉叫，
因為迦南人攏敗壞！ 見若擔銀的人攏受剪除。 |
| 1:12 | 彼時，我欲用燈搜尋耶路撒冷；
我欲辦許個親像佇渣滓頂坐清者； 𪜶心內講： 耶和華無欲降福氣，也無欲降災禍。 |
| 1:13 | 𪜶的貨財欲互人搶；
𪜶的厝宅欲拋荒。 𪜶欲起厝，也無通徛佇內面； 栽種葡萄園，也無通飲伊的酒。 |
| 1:14 | 耶和華的大日近啦，
彼個日是近閣真緊， 耶和華的日的聲； 佇遐勇士大艱苦喉叫。 |
| 1:15 | 彼日是大受氣的日，
是患難困苦的日， 是敗壞凄凊的日， 是黑黑暗暗的日，是密雲大暗的日， |
| 1:16 | 是歕號頭喝喊的日，
欲攻擊堅固的城及高的城樓。 |
| 1:17 | 我欲互人抵著艱苦，
互𪜶親像睛瞑者啲行， 因為𪜶得罪耶和華。 𪜶的血欲傾出親像塵埃； 𪜶的肉欲㧒擲親像糞埽。 |
| 1:18 | 當耶和華受氣的日，
𪜶的銀𪜶的金𣍐會救𪜶； 全地欲互伊大受氣的火燒滅， 因為伊欲緊緊剿滅地上攏總徛起的百姓。 |