| 章節 | 台語漢字本聖經 請按此下載安裝Open Han 2024版字型，免得漏掉造字 |
| 7:1 | 以色列人的腐敗 我有災禍啊！我親像夏天的果子收成了的時， 閣親像挽葡萄所剩的零星粒， 無歸葩通食； 我的心欣慕起頭熟的無花果。 |
| 7:2 | 地上虔誠的人死無；
佇人的中間無正直者； 𪜶攏埋伏，欲刣死人， 用羅網當伊的兄弟。 |
| 7:3 | 𪜶的手專專做歹；
首領及審判司討賄賂； 大官員吐出伊心內的私慾， 相及組織歹。 |
| 7:4 | 𪜶中間第一好者，親像蒺藜；
第一正直者，親像籬笆的莿仔。 你的守望者所講的日，就是你受刑罰的日近啦。 𪜶的迷亂到啦。 |
| 7:5 | 莫得倚靠同伴；
莫得信親密的朋友。 著約束你的嘴； 莫得對所疼的某講起。 |
| 7:6 | 因為，子藐視老父；
查某子忤逆老母； 媳婦忤逆乾家； 人的對敵就是伊家內的人。 |
| 7:7 | 若是我，我欲向望耶和華，
亦欲聽候救我的上帝； 我的上帝欲聽我。 |
| 7:8 | 上帝賜救恩 我的對敵啊，莫得因為我來歡喜。 我雖然跋倒，欲閣起來； 我坐佇黑暗， 耶和華做我的光。 |
| 7:9 | 我欲忍受耶和華的受氣；
因為我得罪伊， 聽候伊辯護我的案，給我判斷。 伊欲導我出來到佇光明； 我也欲看見伊的公義。 |
| 7:10 | 彼時我的對敵，
就是曾對我講「耶和華──你的上帝佇叨落」者， 伊一下看見就大大見誚。 我欲親目看見伊； 伊欲受𧿬踏， 親像街路的土糜。 |
| 7:11 | 起你的城牆的日到啦，
彼日，你的地界欲開闊。 |
| 7:12 | 彼日，𪜶欲對亞述，
到埃及諸個城， 對埃及到大河， 對此個海到彼個海， 對此個山到彼個山， 攏欲歸倚。 |
| 7:13 | 總是，地欲因為徛起的百姓的緣故，來拋荒，
是𪜶行做的結果。 |
| 7:14 | 耶和華憐憫以色列 求你用你的枴仔飼你的百姓， 就是你的產業的羊群， 佇迦密山家己𫢶佇樹林內者。 飼𪜶佇巴珊及基列，親像早時一樣。 |
| 7:15 | 我欲顯出奇事互伊看，
親像你出埃及地的時一樣。 |
| 7:16 | 列邦看見就欲為家己的勢力見誚；
𪜶欲用手掩嘴，𪜶的耳孔也欲臭聾。 |
| 7:17 | 𪜶欲舐土粉親像蛇，
親像佇土腳啲趖的物， 愕愕惙出伊的孔。 𪜶欲驚惶來歸咱的上帝──耶和華， 閣因為你來驚惶。 |
| 7:18 | 上帝啊，是誰親像你，是赦免罪過，
寬恕伊所剩的百姓的過失者， 伊無永永囥受氣，因為伊歡喜憐憫？ |
| 7:19 | 伊欲越轉憐憫咱，
伊踏咱的罪惡佇腳下， 你欲將𪜶一切的罪惡㧒佇深海。 |
| 7:20 | 你欲照古早所對阮的列祖咒誓者，
是誠實佇雅各， 行慈愛佇亞伯拉罕。 |