| 章節 | 台語漢字本聖經 請按此下載安裝Open Han 2024版字型，免得漏掉造字 |
| 4:1 | 耶和華做王，天下太平 到許個日的了後， 耶和華殿的山欲建立， 佇諸個山的頂面，𨃟過攏總的山嶺； 萬國的百姓攏欲來歸伊。 |
| 4:2 | 有多多國欲去，講：
來啊，咱上耶和華的山， 到雅各的上帝的殿。 伊欲用伊的道路教示咱； 咱也欲行伊的路。 因為律法欲對錫安出； 耶和華的話欲對耶路撒冷傳報。 |
| 4:3 | 伊欲佇多多國的百姓中行審判，
為著多多遠遠強猛的國來解決。 𪜶欲將𪜶的刀拍做犂頭， 將𪜶的槍拍做鐮仔。 此國無攑刀攻擊彼國； 𪜶也無閣學習交戰。 |
| 4:4 | 人人攏欲坐佇伊家己的葡萄樹腳，
及家己的無花果樹腳，無人互伊驚。 因為這是萬軍的耶和華親嘴講的。 |
| 4:5 | 萬百姓逐個奉伊的上帝的名來行；
總是阮欲奉阮的上帝──耶和華的名來行，直到永遠。 |
| 4:6 | 以色列人倒轉本國 耶和華講：到彼日， 我欲聚集跛腳者， 招集受趕出者及我所曾互伊受苦者。 |
| 4:7 | 我欲互跛腳者做所剩的百姓，
互受趕到遠遠者做強的國。 耶和華欲佇錫安山做王治理𪜶， 對今到永遠。 |
| 4:8 | 論到你做歸群羊的守更樓、做錫安城的山啊，
國權欲歸佇你── 閣早時的國權，耶路撒冷城的國位── 攏欲歸佇你。 |
| 4:9 | 今你啥事大聲啼哭啊？
痛苦擒著你，親像欲生子的婦仁人， 是因為恁中間無王嗎？ 恁的謀士死無嗎？ |
| 4:10 | 錫安的查某子啊，
你著痛疼艱苦，親像生子的婦仁人； 因為你欲出城， 徛起佇田裡，欲到巴比倫。 佇遐得著救； 耶和華欲佇遐贖回你脫離你的對敵的手。 |
| 4:11 | 今多多國的百姓聚集攻擊你，講：
願錫安受染垃墋！ 互阮親目看見！ |
| 4:12 | 總是𪜶知耶和華的意思，
也無明白伊的計劃。 伊聚集𪜶，親像稻把聚集佇五穀場。 |
| 4:13 | 錫安的查某子啊，起來踏五穀！
我欲互你的角成做鐵， 互你的蹄成做銅。 你欲拍碎多多國的百姓， 將𪜶所搶的物獻互耶和華， 將𪜶的錢財獻互普天下的主。 |