| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 俄巴底亞所得著的默示。
耶和華欲懲罰以東 主耶和華論到以東講： 阮對耶和華遐聽見消息， 也有使者奉差去列國， 講：起來啊， 咱著起來及伊交戰！ |
| 1:2 | 看啊，我互你佇列國中做微細，
互人大大看輕。 |
| 1:3 | 𫢶佇石洞內、徛起高的所在的啊，
你的心的驕傲騙你， 心內講：是誰會給我降落地啊？ |
| 1:4 | 你雖然升高親像鷹鳥，
作巢佇星的中間， 我欲對遐給你降落。 這是耶和華講的。 |
| 1:5 | 賊若來你遐，
抑是強盜暝時來── 豈是偷到滿意若定── 挽葡萄者若來到你遐挽， 豈無猶留幾粒仔嗎？ 你抵著剪除到怎樣啊？ |
| 1:6 | 以掃怎樣受搜尋啊？
伊所囥的寶物怎樣受查出啊？ |
| 1:7 | 及你結約者攏帶你到邊界；
及你和好者欺騙你，卡贏你； 食你的米糧者設活罩佇你的下面； 伊的心攏無智識。 |
| 1:8 | 耶和華講：到彼日，
我豈無對以東除滅智慧的人？ 對以掃的山除滅聰明的人？ |
| 1:9 | 提幔啊，
你的勇士欲驚惶， 致到𫢶以掃的山逐人受刣死剪除。 |
| 1:10 | 以東受罰的原因 因為你暴虐你的兄弟雅各， 你欲抵著大大見誚， 你亦欲永遠受剪除。 |
| 1:11 | 當你徛佇邊頭的日，
外人搶伊的財物， 異邦人入伊的城門， 為耶路撒冷拈鬮， 彼日你親像𪜶中間的一個。 |
| 1:12 | 當你的兄弟的日，
就是伊抵著患難的日， 你應該徛啲看； 猶大人受滅的日， 你應該為著按呢來歡喜； 𪜶抵著災難的日， 你應該講大話。 |
| 1:13 | 我的百姓抵著災禍的日，
你應該入伊的門； 𪜶抵著災禍的日， 你應該看𪜶啲受苦； 𪜶抵著災禍的日， 你應該摸著𪜶的財物； |
| 1:14 | 你應該徛佇雙叉路截𪜶中間逃走的人；
𪜶抵著災難的日， 你應該將𪜶剩的人交付對敵。 |
| 1:15 | 上帝欲審判萬國 因為耶和華辦理萬國的日近啦。 照你所行的，也欲按呢行佇你； 你所做的欲歸佇你的頭殼。 |
| 1:16 | 因為親像恁佇我的聖山曾飲，
萬國也欲親像按呢長長飲； 亦飲也吞落去，𪜶就欲歸佇無。 |
| 1:17 | 以色列的得勝 佇錫安山欲有逃脫的人， 亦欲成做聖； 雅各家欲得著伊本有的業。 |
| 1:18 | 雅各家欲成做火；
約瑟家欲成做火焰； 以掃的家欲做稻稿； 火欲燒來滅伊。 以掃的家欲無留一個。 因為耶和華有講伊。 |
| 1:19 | 南方的人欲得著以掃的山；
平洋的人欲得著非利士， 亦欲得著以法蓮的田及撒瑪利亞的田； 便雅憫人欲得著基列。 |
| 1:20 | 以色列軍隊諸個受掠者欲得著屬迦南人的地，
直到撒勒法； 𫢶佇西法拉受掠的耶路撒冷人 欲得著南方的城。 |
| 1:21 | 欲有諸個拯救者上錫安山，來審判以掃的山；
國度就歸耶和華。 |