| 章節 | 台語漢字本聖經 請按此下載安裝Open Han 2024版字型，免得漏掉造字 |
| 9:1 | 耶和華的審判 我看見主徛佇祭壇邊； 伊講：你著拍柱枓，互門椗振動， 拍碎伊，來傷著眾人的頭殼； 𪜶所剩的人，我欲用刀刣， 無一個走會離，無一個會得著救。 |
| 9:2 | 𪜶雖然掘到陰間，
我的手欲對遐掠𪜶出來； 雖然上到天， 我欲對遐掠𪜶落來； |
| 9:3 | 雖然匿佇迦密山頂，
我欲搜尋，對遐掠𪜶出來； 雖然閃避我的目睭前匿佇海底， 我欲對遐命令蛇，伊欲咬𪜶； |
| 9:4 | 雖然受掠佇對敵的面前，
我欲對遐命令刀劍，伊欲刣𪜶； 我欲注目看伊， 是欲降災禍是欲降福氣。 |
| 9:5 | 因為主──萬軍的耶和華摸地，地就消溶，
見若徛起彼中間者欲悲哀。 全地欲親像大河漲起來， 亦欲退低親像埃及河。 |
| 9:6 | 佇天頂起伊的房間、
佇地上下穹蒼的地基、 叫海水來傾佇地裡者── 伊的名是耶和華。 |
| 9:7 | 耶和華講：以色列人啊，
我豈無看恁親像古實人嗎？ 我豈是導以色列人出埃及地， 非利士人出迦斐託， 亞蘭人出吉珥嗎？ |
| 9:8 | 看啊，主耶和華注目看此個有罪的國，
我欲對地上滅伊， 總是無欲一盡滅雅各的家。 這是耶和華講的。 |
| 9:9 | 看啊，我欲出命令，
佇萬國中簸以色列家， 親像用簸箕簸五穀， 無一粒𠕇的磕落地。 |
| 9:10 | 我的百姓中間攏總有罪的人講：
災禍𣍐趇著阮， 亦𣍐抵著阮的。 𪜶欲死佇刀下。 |
| 9:11 | 以色列的未來的復興 到彼日，大衛已經倒的布棚，我欲閣給伊徛起來， 也欲補伊的破隙，欲起伊許個倒壞的， 來建立伊，親像早時一樣。 |
| 9:12 | 互𪜶得著以東猶剩的做業，
亦得著許個用我的名來稱的外邦。 這是行此個事的耶和華所講的。 |
| 9:13 | 耶和華講：
看啊，日子欲到， 犂田者欲趇著收割者； 踏葡萄者欲趇著撒種者， 大山欲滴甜酒； 小山欲流奶。 |
| 9:14 | 我欲互我的百姓以色列受掠者倒轉來；
𪜶欲閣起荒廢的城來徛起， 栽葡萄園，來飲伊的酒， 作園，來食伊的果子。 |
| 9:15 | 我欲栽培𪜶佇本土地，
𪜶無閣抵著拔出佇我所互𪜶的地。 這是耶和華──你的上帝講的。 |