| 章節 | 台語漢字本聖經 請按此下載安裝Open Han 2024版字型，免得漏掉造字 |
| 8:1 | 公綿羊、公山羊的異像 伯沙撒王坐位第三年，閣有異象出現互我──但以理看見，就是佇我頭一擺看見的異象的了後。 |
| 8:2 | 我看見異象，看見的時是佇以攔省書珊的宮殿；我看見異象是佇烏萊的河邊。 |
| 8:3 | 我攑目啲看，看啊，有公的綿羊徛佇河的頭前，伊有二支角，二支角攏高。此支卡高彼支，卡高的隨尾發。 |
| 8:4 | 我看見彼隻公的綿羊向西、向北、向南來觸。無一隻獸會徛在佇伊的面前，也無一個會救出伊的手；伊出在意思行，家己做大。 |
| 8:5 | 我啲想的時，看啊，有一隻公的山羊對西勢來，遍行全地，腳無踏著地。此隻山羊佇伊二蕊目睭的中央有一支真顯目的角。 |
| 8:6 | 伊去到有二支角公的綿羊遐，就是我所看見徛佇河的頭前的，發大受氣，走去尋伊。 |
| 8:7 | 我看見伊倚近公的綿羊，向伊發大受氣，觸彼隻綿羊，拍折伊二支角。綿羊無力通徛佇伊的面前；伊就互伊倒佇地裡，𧿬踏伊，無一個會救綿羊出伊的手。 |
| 8:8 | 彼隻山羊家己做真大，當伊強猛的時，彼支大支角。抵著拍折，有發四支顯目的角替伊，向天四面的方。 |
| 8:9 | 𪜶中間一支閣發出一支細支角，成做真大，向南、向東、向榮耀的地。 |
| 8:10 | 伊成做高大到天的軍隊，將軍隊及星辰幾若個㧒落地裡𧿬踏伊。 |
| 8:11 | 閣伊家己做高大，到佇軍隊的主宰；除去逐日所獻互伊的燒祭，毀壞伊的聖所。 |
| 8:12 | 為著罪過的緣故，有軍隊及日日所獻的燒祭交付伊。伊將真理㧒佇地裡，出在意思來行，無亨通。 |
| 8:13 | 我聽見有一位聖者啲講話，閣有一位聖者對彼位啲講話者講：「此個異象就是論到日日所獻的燒祭及致到荒廢的罪惡，互聖所及軍隊受𧿬踏，欲到甚麼時啊？」 |
| 8:14 | 伊給我講：「到二千三百暝日，聖所就欲得著清氣。」 |
| 8:15 | 天使加百列解釋異象 我──但以理，我有看見此個異象，愛欲明白彼個意思。彼時忽然有一位親像人的款式徛佇我的面前。 |
| 8:16 | 我閣聽見烏萊河雙旁岸的中間有人的聲叫講：「加百列啊，著互此人明白此個異象。」 |
| 8:17 | 伊就來到我徛啲的所在。伊一下來，我就驚惶仆佇地裡；伊給我講：「人子啊，你著明白，因為此個異象是關係佇末期。」 |
| 8:18 | 伊及我講話的時，我的面仆佇地裡睏重眠；伊就摸我，扶我起來徛， |
| 8:19 | 伊講：「看啊，我欲互你知受氣的末期所欲有的事，因為此個是關係佇路尾所定著的時。 |
| 8:20 | 你所看見公的綿羊有二支角的，就是瑪代及波斯二個王。 |
| 8:21 | 彼隻長毛公的山羊就是希臘王；伊二蕊目睭中的大支角就是頭一個王。 |
| 8:22 | 論到彼支拍折的角，對伊的地閣發出四支角，按呢有四國，欲對伊的國興起，總是權力𣍐比得伊。 |
| 8:23 | 許個國的末期，人的罪惡貫滿，欲有一個王興起，面貌兇惡，𠢕用詭譎的話。 |
| 8:24 | 伊的權柄成做大，總是是對家己的權柄；伊欲行非常的毀滅，也是亨通，閣照家己的意思來行；閣欲毀滅有權力者以及聖的百姓。 |
| 8:25 | 伊用計謀互伊詭譎的手段亨通，心內家己做大，毀滅多多人，佇𪜶無持防的時；閣欲起來攻擊萬王的王，總是伊欲受毀壞是用人的手。 |
| 8:26 | 前所講下昏早起的異象是真的，總是你著封密彼個異象，因為是關係多多日後的事。」 |
| 8:27 | 對按呢我──但以理昏迷，破病幾若日，然後起來辦理王的事務。我因為此個異象卬愕，無人會曉得。 |