| 章節 | 台語漢字本聖經 請按此下載安裝Open Han 2024版字型，免得漏掉造字 |
| 2:1 | 尼布甲尼撒坐位第二年，尼布甲尼撒夢見，心迫腹，𣍐睏得。 |
| 2:2 | 王命令召博士、術士、師公，及迦勒底人來，愛𪜶用王的夢給伊講，𪜶就來徛佇王的面前。 |
| 2:3 | 王給𪜶講：「我有夢見一個夢，我的心迫腹，愛欲知彼個夢是甚麼。」 |
| 2:4 | 迦勒底人用亞蘭的腔口對王講：「願王萬歲！請將彼個夢給你諸個奴僕講，阮就欲解明。」 |
| 2:5 | 王應迦勒底人講：「彼個事我已經𣍐記得啦，恁若無將我所夢見講互我聽，續解明伊，就欲將恁的肉割碎碎，也恁的厝欲做糞埽堆； |
| 2:6 | 總是恁若將我所夢見給我講，續解明伊，恁欲對我得著贈品、報賞、大榮光。今恁著將我所夢見講互我聽，續解明伊。」 |
| 2:7 | 𪜶第二擺閣對王講：「請王將所夢見的給諸個奴僕講，阮就欲解明伊。」 |
| 2:8 | 王應講：「我準準知恁是故意延迁，因為恁知彼個夢我已經𣍐記得啦。 |
| 2:9 | 恁若無將我所夢見給我講，只有一法通款待恁；因為恁已經有備辦謊言亂語對我講，啲聽候時勢的改變。今恁著將所夢見給我講，我就知恁會解明伊。」 |
| 2:10 | 迦勒底人佇王的面前應講：「王此號事地上無人會講出；因為未曾有君王、大臣、掌權的教博士、抑是術士，抑是迦勒底人著按呢做。 |
| 2:11 | 王所問的是稀奇的事。除去無及世間人同徛起的神明以外，無一個會佇王的面前講出。」 |
| 2:12 | 王受氣，受氣到極，命令剿滅巴比倫一切智慧的人。 |
| 2:13 | 對按呢出命令，欲刣智慧的人，就尋但以理及伊的同伴，欲刣𪜶。 |
| 2:14 | 上帝將夢的意思指示但以理 王的侍衛長亞略出來，欲刣巴比倫智慧的人，但以理用精通智慧的話應伊， |
| 2:15 | 就對王的侍衛長亞略講：「王所出的命令怎樣到即緊急啊？」亞略就將此個代誌給但以理講。 |
| 2:16 | 但以理就入去求王寬限，就欲將夢給王解明。 |
| 2:17 | 但以理倒去伊的厝，將此個事給伊同伴哈拿尼雅、米沙利、亞撒利雅講， |
| 2:18 | 愛𪜶為著此個秘密的事，祈求天頂的上帝憐憫，免得但以理及伊的同伴及巴比倫其餘智慧的人相及滅無。 |
| 2:19 | 此個秘密的事就佇暝時異象中對但以理顯明，但以理就謳咾天頂的上帝。 |
| 2:20 | 但以理講：「上帝的名應該受謳咾到永遠！因為智慧權能攏屬佇伊。 |
| 2:21 | 伊變換時期、節季，伊廢無王，設立王，將智慧互智慧的人，將見識互聰明的人。 |
| 2:22 | 伊指示深奧秘密的事，暗中所有的伊攏知，光也及伊相及住。 |
| 2:23 | 我的列祖的上帝啊，我感謝你，謳咾你，因為你賞賜我智慧才能，今用阮對你所求的已經指示我，因為你有用王的事指示阮。」 |
| 2:24 | 但以理為王解夢 對彼霎，但以理入去見亞略，就是王所派剿滅巴比倫許個智慧的人的，伊去給伊講：「莫得剿滅巴比倫許個智慧的人，導我到王的面前，我欲將夢給王解明。」 |
| 2:25 | 亞略即時導但以理到王的面前，對伊講：「我佇猶大受掠的人的中間抵著一人，伊會將夢給王解明。」 |
| 2:26 | 王對稱做伯提沙撒的但以理講：「你會將我所看見的夢給我講續給我解明嗎？」 |
| 2:27 | 但以理佇王的面前應講：「王所問的秘密，智慧的人、術士、博士、卜卦者攏𣍐給王指明； |
| 2:28 | 總是天頂有一位上帝會顯明秘密的事。今用後日啲欲有的事有指示尼布甲尼撒王。你所夢見的及你佇床裡所想的異象是按呢： |
| 2:29 | 王啊，你佇床裡想到將來的事，彼位顯明秘密的事者用將來所欲有的事指示你。 |
| 2:30 | 論到我彼個秘密的事顯明佇我，是為著我有智慧贏過一切活啲的人，就是刁持欲解明互王知，閣互你知你的心的念頭。 |
| 2:31 | 「王啊，你啲看，就看見有一身大像，此個像真高，極其燦爛，徛佇你的面前，伊的形狀真通驚。 |
| 2:32 | 此個像，伊的頭殼是好金的，伊的胸脇及手骨是銀的，腹肚及大腿是銅的， |
| 2:33 | 伊的腳胴是鐵的，伊的腳盤一半鐵一半土的。 |
| 2:34 | 你啲看到有一塊石拍出來，是用手拍的，摃著彼身像鐵及土的腳盤，來拍破𪜶； |
| 2:35 | 對按呢彼個鐵、土、銅、銀、金做一下拍碎碎，變做夏天五穀場的粗糠，互風吹散，無閣有𪜶的位處。閣此個摃著像的石變成大山，充滿全地。 |
| 2:36 | 「這就是彼個夢。阮今欲佇王的面前解明伊。 |
| 2:37 | 王啊，你是列王的王。天頂的上帝已經將國度、權柄、能力、榮光賞賜你。 |
| 2:38 | 見若世間人徛起的所在，連山野的走獸，空中的飛鳥，伊攏交付你的手，互你掌管諸個一切。你就是彼個金的頭殼。 |
| 2:39 | 你以後欲閣興起一國，值著你；閣有第三國，就是銅的，欲掌管天下。 |
| 2:40 | 第四國，欲堅定親像鐵，鐵會拍破萬物互伊降服，閣親像鐵壓碎一切，伊也欲拍破列國壓碎𪜶。 |
| 2:41 | 你也看見伊的腳盤及腳指頭仔，一半是燒磁的土，一半是鐵，彼個國也欲分開。總是你看見鐵及爛土相參，此個國也欲有鐵的力。 |
| 2:42 | 許個腳指頭仔，既然一半是鐵一半是土，按呢彼個國欲一半強一半弱。 |
| 2:43 | 你既然看見鐵及爛土相參，𪜶欲及人的種族相參，總是二比𣍐相合，親像鐵及土𣍐相參得。 |
| 2:44 | 當許個列王的日，天頂的上帝欲設立一國，永遠𣍐廢無，伊的權柄𣍐會歸佇別國，總是伊欲毀壞許個國來滅伊，家己欲永遠徛在。 |
| 2:45 | 你既然看見有石對山裡拍出來是用手拍的，來拍破彼個鐵、銅、土、銀、金，就是至大的上帝用將來欲有的代誌指示王。彼個夢是真，彼個解明是確實。」 |
| 2:46 | 王賞賜但以理 當時，尼布甲尼撒王仆佇地裡，拜但以理，命令用禮物芳料獻互伊。 |
| 2:47 | 王應但以理對伊講：「你已經會顯明此個秘密的事，恁的上帝真正是諸個上帝的上帝、諸個王的主，閣是顯明許個秘密者。」 |
| 2:48 | 對彼霎王高升但以理，賞賜伊多多上品的禮物，派伊管理巴比倫全省，閣做總理，來掌管巴比倫一切智慧的人。 |
| 2:49 | 但以理求王，王就派沙得拉、米煞、亞伯尼歌管理巴比倫省的事務，獨獨但以理跟隨佇王宮。 |