| 章節 | 台語漢字本聖經 請按此下載安裝Open Han 2024版字型，免得漏掉造字 |
| 45:1 | 歸互耶和華的土地 恁拈鬮分地做業，著獻一份互耶和華來做聖，長二萬五千科尺，闊一萬科尺。伊的界的四圍攏做聖。 |
| 45:2 | 其中分別一段做聖所，長五百，闊五百，伊的款式四方。四圍閣五十肘做郊野的地。 |
| 45:3 | 佇所量的的中間你著量，長二萬五千，闊一萬。彼中間有聖所，就是至聖者。 |
| 45:4 | 這是全地一份的聖地，著歸佇祭司就是做聖所的差用，近倚來服事耶和華的，此個地通做𪜶起厝的所在及聖所的聖地。 |
| 45:5 | 又閣一份，長二萬五千，闊一萬，著歸佇殿內做差用的利未人，做𪜶的業，二十間房。 |
| 45:6 | 恁著分派做城的業，闊五千，長二萬五千，及所獻的聖地相排，這是欲做以色列全家的路用。 |
| 45:7 | 君王的土地 見若歸佇人君者是佇所獻的聖地以及城的業此旁彼旁，佇所獻聖地的頭前及城的業的頭前，對西方向西，對東方向東，伊的長著及𪜶的一支派的份額相同，對西界到東界。 |
| 45:8 | 佇以色列的境內人君欲得著此個做基業。後來我諸個人君無閣欺壓我的百姓，欲用地互以色列家照𪜶的支派。 |
| 45:9 | 君王應守的規例 主耶和華按呢講：「以色列諸個人君啊，恁今夠額啦，著除去強暴及搶劫的事，秉公行義，無閣霸佔百姓的業。這是主耶和華講的。 |
| 45:10 | 「恁著用公道的天秤、公道的伊法、公道的罷特。 |
| 45:11 | 伊法及罷特著平大。互罷特通貯賀梅珥十份的一份，伊法也通貯賀梅珥十份的一份，攏用賀梅珥做標準。 |
| 45:12 | 舍客勒著做二十季拉；二十個舍客勒，二十五個舍客勒，十五個舍客勒，是做恁的彌那。 |
| 45:13 | 「恁所應該獻的禮物著按呢：小麥一賀梅珥著獻伊法六份的一份；大麥一賀梅珥著獻伊法六份的一份。 |
| 45:14 | 論到油的定例，對油的罷特，就是對一柯珥就是十個罷特，閣是一賀梅珥獻一罷特十份的一份（因為十罷特就是一賀梅珥）。 |
| 45:15 | 對以色列肥的草場佇羊群中每二百隻羊，著獻一隻羊羔。做素祭、燒祭、謝恩祭，替𪜶贖罪。這就是主耶和華講的。 |
| 45:16 | 境內的眾百姓攏著用此個禮物獻互以色列的人君。 |
| 45:17 | 人君的本分佇節期、逐月的初一、逐擺安息日，及以色列家中所定著的節期，著獻燒祭、素祭、灌奠祭。伊著備辦贖罪祭、素祭、燒祭、及平安祭，為著以色列家贖罪。」 |
| 45:18 | 節期 主耶和華按呢講：「佇正月初一，恁著取無瑕疵的牛牨，來清氣聖所。 |
| 45:19 | 祭司著將贖罪祭的血，抹佇殿的門竪及壇階的四角，及內院的門竪。 |
| 45:20 | 彼月的初七也著按呢做為著錯誤犯罪的及愚戇來犯著的，來為著殿贖罪。 |
| 45:21 | 「正月十四，恁著守𨃟過節，守此個節七日，著食無酵的餅。 |
| 45:22 | 彼日，人君著為著家己及國內的眾百姓備辦一隻公的牛做贖罪祭。 |
| 45:23 | 當節期的七日，伊著備辦燒祭獻互耶和華，連連七日，逐日著用七隻牛牨、及七隻綿羊牨攏無瑕疵的。逐日也著備辦一隻山羊牨做贖罪祭。 |
| 45:24 | 伊也著備辦素祭，一隻牛牨一個伊法，一隻綿羊牨一個伊法，每伊法著油一欣。 |
| 45:25 | 七月十五守節的時，七日久伊著按呢做，照贖罪祭、照燒祭、照素祭，也著照油。」 |