| 章節 | 台語漢字本聖經 請按此下載安裝Open Han 2024版字型，免得漏掉造字 |
| 42:1 | 聖殿附近的二間厝 伊導我出來到外院，閣導我入另外隔開的地相對面的房；彼間房向北佇厝宅的對面。 |
| 42:2 | 佇一百肘長，五十肘闊的頭前，有北門。 |
| 42:3 | 屬內院二十肘的對面，閣屬外院舖石地的對面，有樓的廊對樓的廊三層。 |
| 42:4 | 佇許個房的頭前有一條路，闊十肘，向內面一百肘的路。𪜶的門攏向北。 |
| 42:5 | 頂層的房卡狹，因為互樓的廊佔伊的地，比中層下層佔卡多。 |
| 42:6 | 因為伊有三層，總是無柱，親像許個院的柱；所以伊的頂層比地平的下層中層卡狹。 |
| 42:7 | 閣佇外面的房的邊頭，向彼個房的頭前的外院，長五十肘。 |
| 42:8 | 因為外院諸個房長五十肘。看啊，殿的頭前有一百肘。 |
| 42:9 | 佇房的下面，對東旁有入去的所在，就是人對外院會入去遐。 |
| 42:10 | 向南佇院的牆的闊，佇隔開的所在對面，也佇厝宅的對面有許個房。 |
| 42:11 | 伊的頭前有路，𪜶親像向北的房的款式，長闊攏相同；出入的所在攏照𪜶的款式，也照𪜶的門。 |
| 42:12 | 照向南許個房的門，佇路的頭有門，就是東勢的牆面前的路，佇入去的所在。 |
| 42:13 | 伊給我講：「隔開的所在的頭前諸個北勢的房南勢的房，攏是聖的房；親近耶和華的祭司欲佇遐食至聖的物，也用至聖的物，就是素祭、贖罪祭、補過失的祭，下佇彼所在，因為此所在是聖。 |
| 42:14 | 祭司入去的時，就通對聖所出來到外院，著佇遐放下𪜶行職份的時所穿的衫，因為彼是聖；著換𪜶的衫才通到屬佇百姓的。」 |
| 42:15 | 聖殿周圍的寸尺 伊量內厝明白，就導我出向東的門，量伊的四圍。 |
| 42:16 | 伊用科尺量東方就是用科尺量伊的四圍，五百科尺， |
| 42:17 | 伊用科尺量北方，量伊的四圍五百科尺， |
| 42:18 | 伊用科尺量南方五百科尺， |
| 42:19 | 伊越到西方，用科尺量伊五百科尺。 |
| 42:20 | 伊量伊的四方，四圍有牆，長五百，闊五百，來分別聖者及平常者。 |