| 章節 | 台語漢字本聖經 請按此下載安裝Open Han 2024版字型，免得漏掉造字 |
| 37:1 | 枯焦的骨欲活 耶和華的手下佇我的身上。耶和華用伊的神導我出去，下我佇山谷中；彼個山谷有骨頭滿滿。 |
| 37:2 | 伊互我對骨頭的四圍經過，看啊，佇山谷的面上有骨頭真多，看啊，𪜶真枯焦。 |
| 37:3 | 伊對我講：「人子啊，諸個骨會活𣍐？」我應講：「主耶和華啊，你知伊。」 |
| 37:4 | 伊閣對我講：「你著對諸個骨宣傳來給𪜶講：恁枯焦的骨啊，著聽耶和華的話。 |
| 37:5 | 主耶和華給諸個骨按呢講：『看啊，我欲互活氣入恁的內面，恁就欲活。 |
| 37:6 | 我欲互恁的頂面有筋，閣互恁有肉，閣用皮給恁包，用活氣入佇恁，恁就會活；恁就知我是耶和華。』」 |
| 37:7 | 對按呢，我趁命令來宣傳。當我啲宣傳的時，有聲，忽然地動；諸個骨相連合，逐支歸伊的本位。 |
| 37:8 | 我看伊，看見骨的頂面有筋，也有肉，閣有皮包佇伊的頂面，總是內面無活氣。 |
| 37:9 | 伊就對我講：「你著向風來宣傳，人子啊，著宣傳來對風講，主耶和華按呢講：活氣啊，對許個風來，歕佇諸個受刣者，互𪜶會活。」 |
| 37:10 | 對按呢，我照伊所命令我的來宣傳，活氣就來入佇𪜶，𪜶就活，起來徛，成做極大的軍隊。 |
| 37:11 | 伊就給我講：「人子啊，諸個骨就是以色列的全家。看啊，𪜶講：『阮的骨攏枯焦，阮的向望攏失落，阮一盡剿滅。』 |
| 37:12 | 所以你著宣傳來對𪜶講，主耶和華按呢講：『我的百姓啊，看啊，我欲開恁的墓，互恁對恁的墓起來，導恁入以色列地。 |
| 37:13 | 我的百姓啊，我開恁的墓，互恁對恁的墓起來，恁就知我是耶和華。 |
| 37:14 | 我欲將我的神下佇恁的內面，恁就欲活。我安置恁佇本所在，恁就知我──耶和華按呢講，也按呢成。這是耶和華講的。』」 |
| 37:15 | 猶大及以色列組成聯合王國 耶和華的話閣臨到我講： |
| 37:16 | 「人子啊，你著提一塊柴板，佇伊的頂面寫『為猶大及伊的同伴以色列族』；閣提一塊柴板，佇伊的頂面寫『為著約瑟、以法蓮，及伊的同伴以色列全家』的柴板。 |
| 37:17 | 你著互𪜶相倚連做一塊柴板，就佇你的手中欲成做一塊。 |
| 37:18 | 設使你的百姓問你講：『你做此個甚麼意思？你指示阮嗎？』 |
| 37:19 | 你就著對𪜶講：『主耶和華按呢講：看啊，我欲提以法蓮的手所攑約瑟的柴板，及伊的同伴以色列諸個支派，我欲下伊倚佇猶大的柴板，互伊成做一塊的柴板，就伊欲成做一塊佇我的手。』 |
| 37:20 | 你所寫彼二塊柴板，著佇𪜶的目睭前攑佇你的手。 |
| 37:21 | 你著對𪜶講，主耶和華按呢講：看啊，我欲取以色列族對𪜶所到的逐國出來，閣對四圍聚集𪜶，導𪜶倒來本所在。 |
| 37:22 | 我欲互𪜶佇彼個地，佇以色列的山合做一百姓，有一個王做𪜶眾人的王。𪜶無閣做二旁的百姓，也無閣分做二國； |
| 37:23 | 也無閣因為偶像及可惡的物，以及一切的罪過拍垃墋本身。我欲救𪜶出𪜶一切徛起的所在，就是𪜶犯罪遐；我欲清氣𪜶，按呢，𪜶欲做我的百姓，我欲做𪜶的上帝。 |
| 37:24 | 「我的奴僕大衛欲做𪜶的王；𪜶攏欲歸佇一個牧者。𪜶欲順趁我的法度，守我的律例來行。 |
| 37:25 | 𪜶欲徛起佇我賞賜我的奴僕雅各的地，就是恁的列祖所徛起的。𪜶及𪜶的子孫，以及子子孫孫，攏永遠徛起佇遐。我的奴僕大衛欲做𪜶的人君，直到永遠。 |
| 37:26 | 閣我欲及𪜶立平安的約，及𪜶做永遠的約。我也欲建設𪜶，互𪜶的人額加添，閣佇𪜶的中間設立我的聖所，直到永遠。 |
| 37:27 | 我徛起的所在欲佇𪜶中間；我欲做𪜶的上帝，𪜶欲做我的百姓。 |
| 37:28 | 我的聖所佇𪜶中間直到永遠，外邦人就欲知我是耶和華，互以色列成做聖的。」 |