| 章節 | 台語漢字本聖經 請按此下載安裝Open Han 2024版字型，免得漏掉造字 |
| 34:1 | 以色列的牧者 耶和華的話臨到我講： |
| 34:2 | 「人子啊，你著宣傳攻擊以色列諸個牧者，你著宣傳來對𪜶，講，主耶和華對諸個牧者按呢講：災禍啊！以色列諸個牧者因為𪜶養飼家己。牧者豈應該養飼羊群嗎？ |
| 34:3 | 恁食伊的油、穿伊的毛、刣伊的肥者，也無養飼羊群。 |
| 34:4 | 軟弱者，恁無顧互伊勇；破病者，恁無給伊醫治；受傷者，恁無給伊包；受趕逐者，恁無導伊倒來；失落者，恁無尋伊；獨獨用強暴嚴嚴的管轄。 |
| 34:5 | 因為無牧者，羊就四散；已經四散，就做一切野獸的食物。 |
| 34:6 | 我的羊四界行佇諸個山裡，佇逐個高的山頂，四散佇全地，無人去追，無人去尋。 |
| 34:7 | 「所以，恁諸個牧者著聽耶和華的話。 |
| 34:8 | 主耶和華講：我指我的永活來咒誓，我的羊因為無牧者就成做受搶的物，羊也做一切野獸的食物。也我的牧者無尋我的羊；諸個牧者因為𪜶養飼家己，無養飼我的羊。 |
| 34:9 | 所以恁諸個牧者著聽耶和華的話。 |
| 34:10 | 主耶和華按呢講：我及牧者做對敵，欲對𪜶的手追討我的羊，互𪜶無閣養飼羊群；牧者也無閣養飼家己。我欲救我的羊脫離𪜶的嘴，無閣做𪜶的食物。」 |
| 34:11 | 好牧者 「因為主耶和華按呢講：看啊，我，我欲本身尋我的羊，來尋著伊。 |
| 34:12 | 牧者佇羊群四散的日怎樣尋伊的羊，我也欲親像按呢尋我的羊。諸個羊佇密雲黑暗的日四散到逐所在，我欲對遐救𪜶倒來。 |
| 34:13 | 我欲對列國中導𪜶出，對逐國的內面聚集𪜶，導𪜶倒來𪜶的本所在，也欲佇以色列山諸個溪邊、境內一切通徛起的所在，來養飼𪜶。 |
| 34:14 | 我欲佇好好的草場養飼𪜶。𪜶的羊欲佇以色列高位的山，𪜶欲佇好好的羊內倒啲睏，也佇以色列山肥媠的草場食草。 |
| 34:15 | 主耶和華講：我欲本身養飼我的羊，互𪜶倒啲睏。 |
| 34:16 | 失落者，我欲尋伊；受趕逐者，我欲導伊倒來；受傷者，我欲包伊；破病者，我欲醫治伊；獨獨肥者勇者，我欲除滅伊，也欲秉公養飼𪜶。 |
| 34:17 | 「我的羊群啊，論到恁，主耶和華按呢講：我欲佇羊及羊的中間，公的綿羊及公的山羊的中間行判斷。 |
| 34:18 | 你佇好好的草場食草，猶掠做小可事嗎？剩的草，恁竟然用腳𧿬踏伊；恁飲清的水，剩的，恁竟然用腳拍濁伊。 |
| 34:19 | 論到我的羊，是食恁用腳踏的，飲恁用腳拍濁的。 |
| 34:20 | 「所以，主耶和華對𪜶按呢講：看啊，我本身佇肥的羊及瘦的羊的中間行判斷。 |
| 34:21 | 因為恁用身軀用肩頭夾𪜶，用恁的角觸破病者，致到互𪜶四散佇外面。 |
| 34:22 | 所以，我欲拯救我的羊群，無閣做受搶的物；我亦欲佇羊及羊的中間行判斷。 |
| 34:23 | 我欲設立一個牧者照顧𪜶，伊欲養飼𪜶，就是我的奴僕大衛。伊欲養飼𪜶，做𪜶的牧者。 |
| 34:24 | 我──耶和華欲做𪜶的上帝，我的奴僕大衛欲佇𪜶的中間做首領。這是我耶和華講的。 |
| 34:25 | 「我欲及𪜶立平安的約，互惡獸對境內斷絕，𪜶就欲安然徛起佇曠野，睏佇樹林內。 |
| 34:26 | 我欲互𪜶及我的山四圍的所在成做福氣的源頭，我亦欲照時落雨，欲有施福氣的大雨。 |
| 34:27 | 田野的樹欲結果子，地也欲出產；𪜶欲安然徛起佇本所在。我遏折𪜶所背的軛，救𪜶脫離彼個掠𪜶做奴才的人的手；彼時，𪜶就知我是耶和華。 |
| 34:28 | 𪜶無閣做外邦人所搶的物，地上的野獸也無閣吞食𪜶；是欲安然徛起，無人互𪜶驚惶。 |
| 34:29 | 我欲給𪜶興起一個出名栽種的所在；𪜶佇境內無閣互飢荒所滅，也無閣受著外邦人的凌辱。 |
| 34:30 | 𪜶欲知我、耶和華──𪜶的上帝是及𪜶佇啲，也知𪜶──以色列家是我的百姓。這是主耶和華講的。 |
| 34:31 | 恁是我的羊，是我草場的羊，恁是人，我也是恁的上帝。這是主耶和華講的。」 |