| 章節 | 台語漢字本聖經 請按此下載安裝Open Han 2024版字型，免得漏掉造字 |
| 29:1 | 責備埃及 第十年十月十二，耶和華的話臨到我講： |
| 29:2 | 「人子啊，你的面著向埃及王法老宣傳來攻擊伊以及埃及全地， |
| 29:3 | 你著傳講，主耶和華按呢講：
看啊，埃及王法老啊， 我做你的對敵，你就是大鱷魚倒佇家己的江河中。 你曾講：我的河是我的， 我為家己來造的。 |
| 29:4 | 我欲用鈎鈎住你的牙槽，
閣互你江河中的魚敆住佇你的鱗； 我欲將你及所敆住佇你的鱗的魚， 對江河中拖出來。 |
| 29:5 | 我欲將你及你江河中的魚攏㧒佇曠野；
你欲倒佇田裡， 無拾做堆，無收拾。 我將你互地上的野獸、空中的飛鳥做食物。 |
| 29:6 | 「埃及徛起的百姓，攏欲知我就是耶和華，因為𪜶對以色列家曾做蘆葦的枴仔。 |
| 29:7 | 𪜶用手攑你，你𤿎開，傷著𪜶的肩頭；𪜶倚你，你折去，閃著𪜶的腰。 |
| 29:8 | 所以主耶和華按呢講：看啊，我欲互刀劍臨到你，對恁中間剪除人及精牲。 |
| 29:9 | 埃及地欲荒廢冷靜，𪜶就知我是耶和華。 「因為伊家己講：『此個河是我的，是我造的』， |
| 29:10 | 看啊，我及你以及你的江河做對敵，互埃及地，對色弗尼的塔直到古實的交界，全然荒廢冷靜。 |
| 29:11 | 人的腳無對遐過，獸的腳也無對遐過，歷過四十年久無人徛起。 |
| 29:12 | 我欲互埃及地佇冷靜的地成做冷靜，伊的城佇荒廢的城中變做荒廢，歷過四十年。我也欲將埃及人分散佇列國，四散佇列邦。」 |
| 29:13 | 主耶和華按呢講：「滿四十年，我欲招集埃及人對𪜶所四散去的列國來。 |
| 29:14 | 我欲互埃及受掠者倒來，互𪜶倒來𪜶的本地巴忒羅。佇遐欲成做微細的國， |
| 29:15 | 欲做列國中第一微細的，亦無閣自高佇列國的頂面。我欲減少𪜶，致到𪜶無管轄列國。 |
| 29:16 | 伊的確無閣做以色列家所倚靠者；所越頭來仰望的，免得我記得𪜶的罪。𪜶就知我是主耶和華。」 |
| 29:17 | 尼布甲尼撒欲征服埃及 二十七年正月初一，耶和華的話臨到我講： |
| 29:18 | 「人子啊，巴比倫王尼布甲尼撒互伊的軍兵大大著磨，攻擊推羅，致到逐個頭殼無毛，肩頭翏皮；總是伊及伊的軍兵對佇推羅，攏無得著工錢，來報答伊大大著磨的攻擊。 |
| 29:19 | 所以主耶和華按呢講：看啊，我欲將埃及地賞賜巴比倫王尼布甲尼撒；伊欲掠伊的眾百姓，搶伊所搶的物，劫伊所劫的物，這就通做伊的軍兵的工錢。 |
| 29:20 | 我將埃及地互伊，報答伊所著磨者，因為𪜶替我做工。這是主耶和華講的。 |
| 29:21 | 「當彼日，我欲互一支角為著以色列家發出，閣欲互你開嘴佇𪜶中間；𪜶就知我是耶和華。」 |