| 章節 | 台語漢字本聖經 請按此下載安裝Open Han 2024版字型，免得漏掉造字 |
| 20:1 | 上帝的旨意，人的悖逆 第七年五月初十，有以色列的長老幾若人來欲問耶和華，坐佇我的面前。 |
| 20:2 | 耶和華的話臨到我講： |
| 20:3 | 「人子啊，你著對以色列的長老講，給伊講，主耶和華按呢講：恁來是欲問我嗎？主耶和華講：我指我的永活來咒誓，我互你問。 |
| 20:4 | 人子啊，你欲審問𪜶，審問𪜶嗎？你著互𪜶知𪜶的列祖許個可惡的事， |
| 20:5 | 對𪜶講，主耶和華按呢講：當我揀以色列的日，向雅各家的後裔攑起我的手，佇埃及地互𪜶識我，對𪜶攑起我的手，講：我是耶和華──恁的上帝。 |
| 20:6 | 彼日我對𪜶攑起手，欲導𪜶出埃及地，到我為著𪜶所講流奶及蜜的地；彼個地佇萬國中是卡有榮光的。 |
| 20:7 | 我對𪜶講，恁逐人著棄拺目睭所歡喜許個可惡的代；通因為埃及的偶像拍垃墋家己。我是耶和華──恁的上帝。 |
| 20:8 | 總是𪜶悖逆我，肯聽我，放拺𪜶逐人目睭所歡喜許個可惡的代，離開埃及的偶像。 「我就講，我欲將我的大受氣傾佇𪜶的頂面，佇埃及地對𪜶一盡成我的受氣。 |
| 20:9 | 獨獨我因為我的名的緣故行代誌，免得我的名佇𪜶所徛起列邦中的面前受褻瀆，我導𪜶出埃及地，佇列邦中的目睭前互𪜶識我。 |
| 20:10 | 按呢，我就互𪜶出埃及地，導𪜶到曠野， |
| 20:11 | 將我的律例賞賜𪜶，將我的法度指示𪜶；就是人若行伊欲對伊來得著活者。 |
| 20:12 | 閣我用我的安息日賞賜𪜶，通佇我及𪜶的中間做證據，互𪜶知我──耶和華是互𪜶成做聖者。 |
| 20:13 | 總是以色列家佇曠野悖逆我，無順趁我的律例，棄拺我的法度（就是人若行伊，欲對伊來得著活者），大大犯著我的安息日。 「我就講，欲佇曠野將我的大受氣傾佇𪜶的頂面，滅無𪜶。 |
| 20:14 | 獨獨我因為我的名的緣故行代誌，免得我的名受褻瀆佇列邦人的目睭前，就是許個看見我導𪜶出埃及的列邦。 |
| 20:15 | 閣我佇曠野對𪜶攑起我的手講，我無欲導𪜶入我所賞賜𪜶流奶及蜜的地（彼個地佇萬國中卡有榮光的）； |
| 20:16 | 因為𪜶厭賤我的法度，無順趁我的律例，犯著我的安息日，𪜶的心意向𪜶的偶像。 |
| 20:17 | 雖然按呢，我的目睭猶久是惜𪜶，無毀滅𪜶，無佇曠野給𪜶滅了了。 |
| 20:18 | 「我佇曠野對𪜶的子兒講：莫得趁恁老父的律例，莫得守𪜶的法度，亦莫得因為𪜶的偶像拍垃墋家己。 |
| 20:19 | 我是耶和華──恁的上帝，恁著順趁我的律例，守我的法度來行伊， |
| 20:20 | 閣用我諸個安息日做聖。諸個日佇我及恁的中間做證據，互恁知我是耶和華──恁的上帝。 |
| 20:21 | 獨獨𪜶的子兒悖逆我，無順趁我的律例，亦無守我的法度來行伊（就是人若行伊，欲對伊來得著活者），𪜶犯著我的安息日。 「我就講，我欲將我的大受氣傾佇𪜶的頂面，佇曠野一盡成我的受氣攻擊伊。 |
| 20:22 | 雖然按呢，我猶久勼我的手為著我的名的緣故行代誌，免得我的名受褻瀆佇列邦人的目睭前，就是許個看見我導𪜶出埃及的列邦。 |
| 20:23 | 閣我佇曠野對𪜶攑起我的手講，欲分散𪜶佇列國，四散𪜶佇列邦； |
| 20:24 | 因為𪜶無趁我的法度，厭賤我的律例，犯著我的安息日，目睭意向𪜶老父的偶像。 |
| 20:25 | 閣我用好的律例，及𣍐會對伊來得著活的法度互𪜶。 |
| 20:26 | 𪜶用一切的頭上子經過火，我就佇𪜶的祭祀給𪜶拍垃墋，互𪜶荒廢，互𪜶知我是耶和華。 |
| 20:27 | 「人子啊，你著對以色列家講話，給𪜶講，主耶和華按呢講：恁的列祖得罪我用按呢褻瀆我； |
| 20:28 | 因為我導𪜶到我攑起手欲賞賜𪜶的地，𪜶看見逐個高山，逐欉艷的樹；就佇遐獻𪜶許個祭祀，獻激我受氣的禮物，亦佇遐燒芳芳的牲禮，及灌奠。 |
| 20:29 | 我就對𪜶講：恁所上彼個高位是甚麼？（伊的名叫做巴麻直到今仔日。） |
| 20:30 | 所以你著對以色列家講，主耶和華按呢講：恁猶原照恁列祖所行的拍垃墋家己嗎？猶原趁𪜶可惡的事行淫嗎？ |
| 20:31 | 恁獻禮物互恁的子經過火的時，猶原將一切的偶像拍垃墋家己，到今仔日嗎？以色列家啊，我豈欲互恁問嗎？主耶和華講：我指我的永活來咒誓，我的確互你問。 |
| 20:32 | 「恁講：阮欲親像外邦人，親像列國的宗族，去服事柴的、石的。恁發起此號心意，斷斷𣍐成。」 |
| 20:33 | 上帝的懲罰及赦免 主耶和華講：「我指我的永活來咒誓，我欲用大權能的手及伸出的手骨，及傾出的大受氣做恁的王。 |
| 20:34 | 我欲用大權能的手及伸出的手骨，及傾出的大受氣，對列邦中導恁出，亦對恁四散去許個國聚集恁。 |
| 20:35 | 我欲導恁到外邦人的曠野，佇遐當面審問恁。 |
| 20:36 | 我按怎樣佇埃及地的曠野審問恁的列祖，亦欲按呢審問恁。這是主耶和華講的。 |
| 20:37 | 我欲互恁經過枴仔下，亦欲互恁受約的拘束。 |
| 20:38 | 我欲對恁中間一盡除許個悖逆及得罪我的人，導𪜶出𪜶寄腳的地方，總是𪜶𣍐得入以色列地。恁就知我是耶和華。 |
| 20:39 | 「以色列家啊，論到恁，主耶和華按呢講：去啊，逐人服事伊的偶像，獨獨後來的確欲聽我，無閣用禮物及偶像褻瀆我的聖名。 |
| 20:40 | 「主耶和華講：佇我的聖山，就是以色列高的山，佇遐以色列全家的眾人欲佇彼個地服事我。佇遐我欲接納恁，佇遐我欲給恁討禮物及恁起頭熟的土產，以及恁一切的聖物。 |
| 20:41 | 我對諸個百姓中導恁出，對恁四散去的列國中聚集恁，彼時我欲接納恁親像芳香；我欲佇恁得著顯明做聖互外邦人看見。 |
| 20:42 | 我導恁入以色列地，就是我攑起我的手講欲賞賜恁列祖的地，彼時恁就知我是耶和華。 |
| 20:43 | 佇遐恁欲記得恁的所行所做，就是恁對許個來拍垃墋恁家己者，閣欲因為恁所行一切的歹來家己厭惡。 |
| 20:44 | 主耶和華講：以色列家啊，我為著我的名的緣故，無照恁的歹所行及恁的腐敗的所做款待恁；恁就知我是耶和華。」 |
| 20:45 | 南方大火 耶和華的話臨到我講： |
| 20:46 | 「人子啊，你的面著向南方，向南方傾出話攻擊南方田野的樹林來宣傳。 |
| 20:47 | 對南方的樹林講，著聽耶和華的話。主耶和華按呢講：看啊，我欲佇你中間起火，燒你中間一切青翠的樹及枯焦的樹，猛烈的火焰的確無熄。對南到北，逐面攏受燒。 |
| 20:48 | 凡若有血氣者攏欲知起火者，是我耶和華。」 |
| 20:49 | 對按呢我講：「嗐啊！主耶和華啊，人攏議論我講：伊豈是啲講譬喻？」 |