| 章節 | 台語漢字本聖經 請按此下載安裝Open Han 2024版字型，免得漏掉造字 |
| 12:1 | 先知扮演難民 耶和華的話閣臨到我講： |
| 12:2 | 「人子啊，你徛起佇悖逆的家中。𪜶有目睭通看亦看，有耳孔通聽亦聽，因為𪜶是悖逆的家。 |
| 12:3 | 所以人子啊，你著為家己備辦受遷徙應用的物件，當頭白日佇𪜶的目睭前來遷徙；閣著對你的所在當𪜶的目睭前遷徙到別位；𪜶雖莽是悖逆的家，豈採對按呢會想。 |
| 12:4 | 你著當頭白日佇𪜶的目睭前帶你的物出去，親像帶受遷徙應用的物一樣。到下昏，你著佇𪜶的目睭前家己出去，親像受掠的人出去一樣。 |
| 12:5 | 你著佇𪜶的面前對牆壁挖孔，對彼孔帶物出去。 |
| 12:6 | 到日暗，你著佇𪜶的目睭前背佇肩頭出去，亦著罩你的面到無看見地，因為我用你做以色列家的兆頭。」 |
| 12:7 | 我就照所吩咐的去行，當頭白日帶我的物件出去，親像帶受遷徙應用的物件。日欲暗，我用手對牆挖孔。日已經暗，就當𪜶的目睭前背佇肩頭帶出去。 |
| 12:8 | 過早起，耶和華的話臨到我講： |
| 12:9 | 「人子啊，以色列家，就是悖逆的家，豈曾問你講：『你做甚麼啊？』 |
| 12:10 | 你著應𪜶講：『主耶和華按呢講：此個啟示關係耶路撒冷的君王以及𪜶中間以色列的全家。』 |
| 12:11 | 你著講：『我做恁的兆頭：我怎樣行，𪜶所抵著的也欲按呢，𪜶欲受掠受遷徙。』 |
| 12:12 | 𪜶中間的君王也欲佇日暗的時，背物佇肩頭帶出去。𪜶欲對牆挖孔，對彼孔帶物出去。伊欲蓋伊的面，因為目睭無看見地。 |
| 12:13 | 我欲張我的羅網佇伊的頂面，伊欲互我的活罩罩著。我欲帶伊到巴比倫、迦勒底人的地；伊雖然死佇遐，也𣍐看見彼個地。 |
| 12:14 | 周圍一切保護伊的及伊所有的軍隊，我欲四散𪜶佇四方，也欲拔刀追趇𪜶。 |
| 12:15 | 我分散𪜶佇列邦、四散𪜶佇列國的時，𪜶就知我是耶和華。 |
| 12:16 | 總是我欲留𪜶幾若人脫離刀劍、飢荒、瘟疫，互𪜶佇所到的逐國中，講起𪜶可惡的事，𪜶就知我是耶和華。」 |
| 12:17 | 先知扮演驚惶愕愕惙的情況 耶和華的話閣臨到講： |
| 12:18 | 「人子啊，你著愕愕惙來食你的餅，著驚惶撙節來飲你的水。 |
| 12:19 | 你著對此個地方的百姓講：主耶和華論耶路撒冷及以色列地徛起的百姓按呢講，𪜶食餅著撙節，飲水著卬愕。因為𪜶中間徛起的眾人所行強暴的事，此個地欲荒廢，失落伊所有的。 |
| 12:20 | 有人徛起的城欲拋荒，地也欲荒廢；恁就知我是耶和華。」 |
| 12:21 | 平凡的俗語及非凡的信息 耶和華的話閣臨到我講： |
| 12:22 | 「人子啊，佇恁以色列地怎樣有此號俗語，講『時日延迁，異象攏無應驗』啊？ |
| 12:23 | 所以你著給𪜶講：『主耶和華按呢講：我欲互此個俗語息，以色列中無閣用此個做俗語。』總是你著給𪜶講：『時日近啦，逐個異象的應驗也是按呢。』 |
| 12:24 | 以後，佇以色列家的中間的確無閣有虛假的異象，順人意的卜卦。 |
| 12:25 | 因為我──就是耶和華，我欲講，閣我所講的話欲應驗，無閣延迁。恁此個悖逆的家啊，我欲佇恁活啲的日來講，來成伊。這是主耶和華講的。」 |
| 12:26 | 耶和華的話閣臨到我講： |
| 12:27 | 「人子啊，看啊，以色列家的人講：『伊所看見的異象是屬佇多多日後的事，所講的讖語是指極遠的時期。』 |
| 12:28 | 所以你著對𪜶講：『主耶和華按呢講：我的話無一句有閣延迁，我所講的話，的確成伊。這是主耶和華講的。』」 |